Ichki ishlar vazirligi rahbariyati tomonidan oʻtkazilgan sayyor qabulda aholi murojaatlari atroflicha koʻrib chiqilib, muammolarni tizimli hal qilishga qaratilgan vazifalar belgilab olindi
2026-10-29 15:45:00 / Yangiliklar
Ichki ishlar vazirligi tomonidan aholi bilan ochiq va samarali muloqotni yoʻlga qoʻyish va murojaatlari bilan ishlash tizimi samaradorligini oshirish maqsadida bir qator ishlar amalga oshirilib, Vazirlik huzuridagi Tergov departamenti tomonidan shaxsiy va sayyor qabullar muntazam ravishda tashkil etib kelinmoqda.
Jumladan, 27-28-oktyabr kunlari Vazir oʻrinbosari R.Ashropov tomonidan navbatdagi shaxsiy qabul oʻtkazilib, aholining mavjud muammolarni aniqlash hamda ularni bartaraf etish maqsadida fuqarolarning murojaatlari tinglandi.
Qabul davomida, jami 314 nafar fuqarolarning 258 ta murojaatlari oʻrganildi.
Murojaatlarning 159 tasi tergov va surishtiruv faoliyati, 39 tasi tergovga qadar tekshiruv, 8 tasi xodimlarning xatti-harakatlari, 8 tasi mahkumni boshqa muassasaga oʻtkazish va 44 tasi ichki ishlar organlariga oid boshqa masalalarni tashkil etadi.
Shuningdek, Qoraqalpogʻiston Respublikasi va viloyatlar aholisi uchun shaxsiy qabul onlayn shaklda ham tashkil etilib, onlayn shaklda kechgan qabul davomida Buxoro, Samarqand, Jizzax, Navoiy va Qashqadaryo viloyatlarida istiqomat qiluvchi fuqarolardan murojaatlar kelib tushdi.
Shaxsiy qabul davomida Vazir oʻrinbosari hamda masʼul rahbar va xodimlar tomonidan fuqarolar bilan ularni qiynayotgan muammolar yuzasidan toʻgʻridan-toʻgʻri muloqot oʻtkazildi.
Xususan, tergovga qadar tekshiruv, surishtiruv va dastlabki tergov jarayonlari, huquqbuzarliklar profilaktikasi hamda boshqa yoʻnalishlardagi murojaatlar qabul qilinib, ularni qonuniy va tezkor hal etish boʻyicha masʼullarga aniq koʻrsatmalar berildi.
Kelib tushgan murojaatlarning 54 tasi yoki 20 foizi shu joyning oʻzida qanoatlantirildi, 28 tasi yoki 11 foizi boʻyicha fuqarolarga tegishli tushuntirishlar berildi. Qolgan 176 ta murojaat yoki 69 foizi qoʻshimcha oʻrganish talab etganligi sababli ijroga yoʻnaltirilib, oʻz vaqtida va xolisona koʻrib chiqilishi nazoratga olindi.
Aholi bilan bunday ochiq muloqot va shaxsiy qabullar tizimli ravishda davom ettirilmoqda.
IIV huzuridagi Tergov departamenti