Namangan viloyati IIBda 25-oktabr — Ichki ishlar organlari xodimlari kuni va tizim tashkil etilganining 35 yilligi munosabati bilan bayram tadbirlari davom ettirilib, bir guruh xodimlar taqdirlandi
2026-10-27 12:05:00 / Yangiliklar
Ichki ishlar organlari xodimlari kuni munosabati bilan tashkil etilgan bayram tadbirlari Namangan viloyati Ichki ishlar boshqarmasida davom ettirildi.
Tantanali marosimda boshqarma rahbariyati, sohaviy xizmatlar rahbarlari, shaxsiy tarkib hamda ichki ishlar organlari faxriylari ishtirok etdi.
Tadbir davomida viloyat IIB boshligʻi, polkovnik Shuhrat Aliyev soʻzga chiqib, shaxsiy tarkib va faxriylarni kasb bayrami bilan samimiy muborakbod etdi hamda Oʻzbekiston Respublikasi Ichki ishlar vazirining bayram tabrigini oʻqib eshittirdi.
Marosim davomida yurt tinchligi va xalq osoyishtaligini taʼminlash, jinoyatchilikka qarshi kurashish hamda jamoat xavfsizligini mustahkamlash yoʻlida munosib xizmat qilayotgan bir guruh rahbar va xodimlar taqdirlandi.
Xususan, xizmat faoliyatida yuqori natijalarga erishgan xodimlarga Ichki ishlar vazirligining «Aʼlo xizmatlari uchun», birinchi, ikkinchi va uchinchi darajali «Benuqson xizmatlari uchun», «Ichki ishlar vazirligining 35 yilligi» esdalik nishonlari, esdalik qoʻl soatlari, kitoblar toʻplami topshirildi. Shuningdek, bir guruh xodimlarga muddatidan oldin navbatdagi maxsus unvonlar berildi. Bundan tashqari, viloyat IIB boshligʻining tegishli buyrugʻiga asosan bir guruh xodimlar esa esdalik qoʻl soatlari bilan ragʻbatlantirildi.
Taqdirlangan xodimlar va faxriylar bildirilgan ishonch hamda eʼtirof uchun minnatdorlik bildirib, kelgusida ham xizmat vazifalarini yuksak masʼuliyat va fidoyilik bilan bajarishga tayyor ekanliklarini qayd etdilar.
Namangan viloyati IIB Axborot xizmati