IIV huzuridagi Qoʻriqlash departamentida kasb bayrami munosabati bilan xodimlar taqdirlandi
2026-10-27 11:10:00 / Yangiliklar
25-oktyabr – Ichki ishlar organlari xodimlari kuni munosabati bilan Ichki ishlar vazirligi huzuridagi Qoʻriqlash departamentida tantanali taqdirlash marosimi boʻlib oʻtdi. Tadbirda yurtimiz tinchligi, jamoat xavfsizligi va fuqarolar osoyishtaligini taʼminlash, davlat va jamiyat manfaatlarini ishonchli himoya qilish yoʻlida sadoqat bilan xizmat qilib kelayotgan xodimlarning fidokorona mehnati munosib eʼtirof etildi.
Tantanali marosimda Qoʻriqlash departamenti boshligʻi polkovnik Qobil Shodibekov soʻzga chiqib, shaxsiy tarkibni kasb bayrami bilan samimiy muborakbod etdi. Qoʻriqlash tizimida amalga oshirilayotgan izchil islohotlar, xizmat faoliyatiga zamonaviy yondashuvlar va erishilayotgan natijalar zamirida, avvalo, oʻz burchiga sodiq, masʼuliyatli va fidoyi xodimlarning mashaqqatli mehnati mujassam ekanini taʼkidladi. Shuningdek, xizmat intizomi, yuksak kasbiy mahorat, halollik va Vatanga sadoqat har bir xodim faoliyatining bosh mezoni boʻlishi lozimligiga alohida eʼtibor qaratildi.
Marosimning eng tantanali qismida xizmat vazifalarini namunali bajarib, yuqori natijalarga erishgan bir guruh xodimlar munosib ragʻbatlantirildi. Jumladan, xodimlarga navbatdan tashqari maxsus unvonlar berildi, bir qator xizmatchilar «Aʼlo xizmatlari uchun», shuningdek, I, II va III darajali «Benuqson xizmatlari uchun» koʻkrak nishonlari, Ichki ishlar vazirligining Faxriy yorliqlari, esdalik qoʻl soatlari hamda kitoblar toʻplamlari bilan taqdirlandi. Ushbu mukofotlar xodimlarning koʻp yillik halol xizmati, kasbiga sadoqati va yuksak masʼuliyatiga bildirilgan ishonch hamda ehtiromning amaliy ifodasi boʻldi.
Tantanali tadbirda taʼkidlanganidek, bugungi kunda qoʻriqlash xizmati nafaqat obyektlar va mol-mulk daxlsizligini taʼminlovchi, balki jamoat xavfsizligini mustahkamlashga munosib hissa qoʻshayotgan muhim tizim sifatida tobora takomillashib bormoqda. Zero, har bir muvaffaqiyat ortida tunu kun sergaklik bilan xizmat olib borayotgan, xalq osoyishtaligini oʻzining sharafli burchi deb bilgan xodimlarning matonati va fidoyiligi mujassam.
Kasb bayrami munosabati bilan oʻtkazilgan mazkur marosim nafaqat munosiblarni taqdirlash, balki butun shaxsiy tarkibni yangi marralar sari ruhlantirish, xizmat burchiga sadoqat va kasbiy masʼuliyat tuygʻularini yanada mustahkamlashga xizmat qildi.
Zero, el-yurt tinchligi yoʻlidagi fidokorona xizmat — yuksak sharaf, xalq ishonchi esa eng oliy eʼtirofdir.
IIV huzuridagi qoʻriqlash departamenti Axborot xizmati