Xotira abadiy, jasorat oʻlmas: Ichki ishlar organlari xodimlari kunida «Millat fidoyilari»ga ehtirom
2026-10-24 16:30:00 / Yangiliklar
Hayotning mazmuni xotiralar bilan oʻlchanadi. Uning qadri esa bosib oʻtilgan umr yoʻlining zalvori bilan tilga olinadi, eslanadi va yaxshi soʻzlar bilan yod etiladi.
Ana shu haqiqat har yili 25-oktyabr — Ichki ishlar organlari xodimlari kunida yanada yaqqol namoyon boʻladi. Bu kun avvalo xizmat vazifasini bajarish chogʻida halok boʻlgan xodimlarni yod etish, ularning pok xotirasiga hurmat bajo keltirishdan boshlanadi.
Ichki ishlar vazirligi rahbariyati, shaxsiy tarkib, faxriylar hamda vazirlik tasarrufidagi taʼlim muassasalari oʻquvchi va kursantlari saf tortib, «Gʻalaba bogʻi» yodgorlik majmuasidagi «Millat fidoyilari» kompozitsiyasi poyiga gulchambar qoʻyishdi. Orkestr qadrlash kuyini ijro etdi. Millatning bugungi kuni, osoyishta va bexavotir zamon uchun jon fido etgan, ona yurtning asl farzandlari esga olindi. Hamkasblari va oila aʼzolari ularning koʻrsatgan ibratli hayot yoʻli hamda xizmat yillarini xotirlashdi.
Bu yil — mustaqilligimizning 35 yilligi hamda Yangi Oʻzbekiston Ichki ishlar organlarining kasb bayrami munosabati bilan shu muqaddas maskanning ahamiyati yanada yorqinroq namoyon boʻlmoqda. Zero millat fidoyilarining jasorati — mustaqillikning mustahkam tamal toshi, tinchlik va osoyishtalikning bebaho garovidir.
«Millat fidoyilari» kompozitsiyasi Yangi Oʻzbekistondagi bunyodkorlik ishlari orasida alohida oʻrin egallagan «Gʻalaba bogʻi»ning uzviy davomidir. Majmua mustaqillik yillarida Vatan himoyasi, el-yurt tinchligi va osoyishtaligi yoʻlida qahramonlarcha halok boʻlgan harbiy xizmatchilar hamda huquq-tartibot organlari xodimlarining xotirasini abadiylashtirish maqsadida Prezidentimiz Shavkat Mirziyoyevning gʻoyasi asosida barpo etilgan va 2025-yilda ochilgan.
Majmuada 196 nafar qahramonning nomi zarhal harflar bilan yozilgan.
Bu yerda marhum xodimlarning bosib oʻtgan yoʻlini raqamlashgan multimedia shaklida koʻrish, ularning shonli faoliyati bilan yaqindan tanishish mumkin.
Davlat rahbari taʼkidlaganidek: Ushbu majmua «Vatan himoyasi har bir avlodning muqaddas ishi ekani, vatanparvarlik anʼanalari davomiyligini» eslatib turadi.
Jasorat — ijodkorlarga ilhom beruvchi eng buyuk xislatlardan biridir. Ichki ishlar organlarining 35 yilligiga bagʻishlanib, Ichki ishlar vazirligi tomonidan tayyorlangan va millat qahramonlarining abadiy xotirasiga bagʻishlangan xotira kitob, marhum xodimlarning oila aʼzolariga vazirlik rahbariyati tomonidan topshirildi.
Tadbir ishtirokchilari xodimlarning ota-onalari, oila aʼzolari va farzandlari bilan suhbatlashib, ularning bugungi kuni, kelajak rejalari va orzulari haqida soʻzlashdi.
Bu kabi tadbirlar barcha hududiy ichki ishlar organlarida tashkil etilib, bayram munosabati bilan xizmat vaqtida halok boʻlgan xodimlarning oila aʼzolari va faxriylar holidan xabar olinmoqda.
Shunday qilib, har bir gulchambar, har bir xotira kitobi va har bir samimiy suhbat — jon fido etganlarning ruhi oldidagi qarzdir. Ularning hayoti biz uchun namuna, ularning xotirasi esa xalqimiz qalbida abadiy yashaydi.