O‘zbеkiston Rеspublikаsi Ichki ishlаr vаzirligi

Poytaxtning Yashnobod tumani ishlab chiqarish va xizmat koʻrsatish korxonalari hamda aholi salmogʻi shiddat bilan oʻsib borayotgan hududlaridan biri boʻlib, Ichki ishlar organlari faoliyatini muvofiqlashtirish boshqarmasiga kuniga yuzlab yurtdoshlarimiz murojaat bilan keladi. Tashrif buyuruvchilar uchun qulay sharoit yaratish, huquqbuzarliklar profilaktikasini taʼminlash va jinoyatchilikka qarshi kurashda samarali natijalarga erishish maqsadida boshqarma uchun yangi bino bunyod etildi.

25-oktyabr Ichki ishlar organlari xodimlari kunida foydalanishga topshirilgan binoning ochilishi bayramga shodiyonalariga ulanib ketdi. Tadbirda Oʻzbekistonda Respublikasi Ichki ishlar vaziri general-leytenant Aziz Tashpulatov tuman xokimligi vakillari, soha faxriylari va jamoatchilik faollari ishtirok etdi.

Ichki ishlar vaziri yangi binoning foydalanishga topshirilishi, uch yuz mingga yaqin tuman aholisi va poytaxt mehmonlari uchun zamonaviy qulayliklarni yaratishi bilan alohida ahamiyatga ega ekanligini taʼkidlab oʻtdi. Bu yerda xizmat olib borayotgan shaxsiy tarkib ham yaratilgan sharoitlardan unumli foydalanib, Davlatimiz rahbari taʼkidlaganidek Yangi Oʻzbekistonga munosib, halollik va sadoqatni bosh mezon sifatida belgilab xizmat olib borishi zarurligi qayd etildi.

Shundan soʻng anʼanaga koʻra ramziy lentalar kesilib, bino faxriylar tomonidan yaxshi tilaklar bilan ochib berildi. Mehmonlar xizmat xonalarida yaratilgan sharoitlar, fuqarolar uchun tashkil etilgan qulayliklar bilan yaqindan tanishtirildi.

Tuman hududida xizmat olib borayotgan kuch-vositalar bir nuqtadan boshqaruv tizimi asosida muvofiqlashtiriladi. Tizim qalqon platformasiga integratsiya qilingan va maʼlumotlar almashinuvi onlayn rejimda amalga oshiriladi.

Avvalgi bino 1967-yilda qurilgan boʻlib koʻp jihatdan zamonaviy talablarni bajara olmaydigan holatda edi. Bitta xizmat xonasida 4-5 nafar xodim xizmat olib borardi. Yangi foydalanishga topshirilgan 100 dan ortiq xizmat xonalarida esa xodimlar zaruriy barcha sharoitlar, texnik vositalar kompyuter jamlanmalari bilan taʼminlandi.

Aholiga xizmat koʻrsatish, migratsiya va personallashtirish, fuqarolarning murojaatlari bilan ishlash, har bir chaqiruvga oʻz vaqtida tezkorlik bilan munosabat bildirish uchun endilikda barcha imkoniyatlar yaratildi.

Shu bilan birga mashgʻulot va fitnes uskunalari bilan jihozlangan sport zal xodimlarni jismoniy va jangovar tayyorgarligini oshirish uchun xizmat qilsa, 204 oʻrinli maʼrifat zali tuman miqyosidagi tadbirlarni oʻtkazish uchun moʻljallangan.

Ichki ishlar vaziri masʼullarga yangi bino shunchaki ichki ishlar organlari faoliyatini muvofiqlashtirish boshqarmasi emas, balki fuqarolar muammosini tezlik bilan hal etadigan, chaqiruvlarga daqiqalar ichida javob beradigan, faoliyatiga zamonaviy texnikalar va sunʼiy intellekt joriy etilgan raqamli boshqarma sifatida xizmat koʻrsatishi lozimligini tushuntirdi.

25-oktyabr Ichki ishlar organlari xodimlari kuni arafasida hududlarda yangi binolarning ochilishi davom etmoqda.