Oʻzbekiston Respublikasi Ichki ishlar vaziri general-leytenant Poʻlat Bobojonovning ichki ishlar organlarining tezkor xizmat xodimlariga tabrigi
2024-10-05 09:00:00 / Yangiliklar
Ichki ishlar organlarining oʻziga xos shonli tarixiga ega boʻlgan Tezkor-qidiruv sohasi tizimning eng asosiy vazifalarni bajaruvchi yoʻnalishlaridan biri hisoblanadi. Shu bois ham bu sohada xizmat qiluvchi xodimlar har tomonlama yetuk salohiyatga, yuksak kasb mahorati va namunali xizmat faoliyatiga ega boʻlishi talab etiladi.
Bugungi kunda ham Ichki ishlar vazirligi va uning hududiy boʻlinmalarida faoliyat olib borayotgan tezkor xodimlar jinoyatchilikning har qanday turiga qarshi murosasiz kurashish, yurtdoshlarimiz xavfsizligi va farovonligini taʼminlash yoʻlida fidoyilik bilan xizmat olib borishmoqda.
Qolaversa, Tezkor-qidiruv sohasi ichki ishlar organlari uchun koʻplab rahbar xodimlarni yetishtirib bergan va bu anʼana hozirgi kunda ham davom etmoqda. Mustaqillikning ilk yillaridan hozirgi kunga qadar tinchlik osoyishtalikni taʼminlash, uyushgan jinoyatchilik, korrupsiya, giyohvandlik, terrorizm va ekstremizmga qarshi kurashishda qahramonlik koʻrsatgan bir qator faxriylar aynan ushbu yoʻnalishda oʻz maktabini yarata olgan desak mubolagʻa boʻlmaydi.
Fursatdan foydalanib, Tezkor-qidiruv sohasining qadrli faxriylarini, xizmat vaqtida halok boʻlgan xodimlarning oila aʼzolari hamda fidoyi tezkor xodimlarni samimiy tabriklayman. Sizlarga olib borayotgan mashaqqatli, shu bilan birga sharafli xizmatingizda ulkan zafarlar, kelgusida soha rivoji yoʻlida amalga oshiradigan ishlaringizda esa muvaffaqiyat doimo hamroh boʻlishini tilayman. Oilangizni tinchlik va xotirjamlik oʻzingizni esa mustahkam sogʻlik tark etmasin!
Oʻzbekiston Respublikasi Ichki ishlar vaziri, general-leytenant P.R. Bobojonov