Oʻzbekiston va Xitoy huquqni muhofaza qiluvchi organlar uchun kadrlar tayyorlash sohasidagi hamkorligi rivojlanmoqda
2026-10-21 03:05:00 / Yangiliklar
Bu borada Ichki ishlar vazirligi akademiyasi hamda Xitoy jamoat xavfsizligi universiteti oʻrtasida yoʻlga qoʻyilgan izchil aloqalarni alohida taʼkidlash joiz. Keyingi yillarda ikki tomonlama hamkorlik memorandumi doirasida oʻndan ziyod taʼlim dasturlari amalga oshirildi. Universitet vakillari uchun tashkil qilingan navbatdagi oʻquv kursi ham manfaatli aloqalarning amaliy ifodasi deyish mumkin.
Oʻquv kursining ochilishi munosabati bilan boʻlib oʻtgan tadbirda akademiya boshligʻi Rustam Xatamov ishtirok etib, mamlakatlarimiz oʻrtasidagi doʻstona munosabatlarga alohida toʻxtaldi.
Taʼkidlanganidek, Oʻzbekiston va Xitoy davlatlarini tarix sinovidan oʻtgan mustahkam rishtalar bogʻlab turadi. Keyingi yillarda oʻzaro aloqalar keng koʻlam kasb etib, sifat jihatdan yangi bosqichga koʻtarildi. Hozirgi global sharoitda har ikki mamlakat strategik sheriklik munosabatlarini yanada mustahkamlashga intilib kelayotgan ishonchli hamkorlardir.
Oʻz navbatida, Xitoy jamoat xavfsizligi universiteti delegatsiyasi rahbari Liu Yezi mamlakatimizga tashrif buyurganidan mamnunligini qayd etdi.
Uning eʼtiroficha, xalqlarimiz oʻrtasidagi tarixiy yaqinlik bugungi munosabatlarda mustahkam poydevor boʻlmoqda. Oʻzaro aloqalarning izchil rivojlanishida oliy darajadagi davlat tashriflarining ahamiyati beqiyos. Ushbu tashriflar oʻzaro ishonch va doʻstlikni mustahkamlashda, hamkorlikning yangi istiqbollari va yoʻnalishlarini ochishda muhim ahamiyat kasb etmoqda.
Shu kunning oʻzida universitet vakillari akademiya faoliyati bilan yaqindan tanishdi. Mehmonlarga oʻquv dargohining tarixi va rivojlanish bosqichlari, kadrlar tayyorlashning zamonaviy imkoniyatlari, taʼlim jarayoniga joriy qilingan ilgʻor yondashuvlar va istiqbolli loyihalar haqida maʼlumot berildi.
Aytish joizki, oʻquv kursi 30-oktyabr kuniga qadar davom etadi.
IIV akademiyasi Axborot xizmati