Jizzaxda kuz-qish mavsumiga tayyorgarlik va yoqilgʻi taʼminoti masalalari oʻrganildi
2026-10-20 16:40:00 / Yangiliklar
Jizzax viloyati hokimligida kuz-qish mavsumida aholini yoqilgʻi mahsulotlari bilan barqaror taʼminlash hamda bu boradagi huquqbuzarliklarning oldini olish masalalariga bagʻishlangan yigʻilish oʻtkazildi.
Unda viloyat hokimi oʻrinbosari Shuhrat Joʻrayev hamda viloyat IIB boshligʻi, general-mayor Gʻayrat Qodirov ishtirok etdi.
Yigʻilishda aholini suyultirilgan gaz va koʻmir mahsulotlari bilan uzluksiz taʼminlash, mahsulotlarning adolatli taqsimlanishi, issiqlik taʼminoti barqarorligini saqlash hamda mavsum davomida yuzaga kelishi mumkin boʻlgan muammolarning oldini olish masalalari muhokama qilindi.
Shuningdek, yoqilgʻi mahsulotlarining talon-toroj qilinishi, hisobdan yashirilishi va noqonuniy sotilishiga qarshi kurashish choralariga alohida eʼtibor qaratildi.
Shu bilan birga, viloyat IIB boshligʻi tomonidan Arnasoy tumanida kuz-qish mavsumiga tayyorgarlik holati oʻrganilib, hudud masʼullari bilan yoqilgʻi taʼminotini barqaror tashkil etish va mavjud muammolarni bartaraf etish masalalari yuzasidan fikr almashildi.
Yakunda taʼminotda uzilishlarga, narxlarning asossiz oshirilishiga hamda yoqilgʻi mahsulotlari bilan bogʻliq qonunbuzilishlarga yoʻl qoʻymaslik, belgilangan vazifalar ijrosini taʼminlash yuzasidan masʼullarga tegishli koʻrsatma va topshiriqlar berildi.
Jizzax viloyati IIB Axborot xizmati