Jizzax va Sirdaryo viloyatlari jurnalist ayollari voleybol maydonida kuch sinashdi
2026-10-19 11:00:00 / Yangiliklar
«IIB boshligʻi kubogi» uchun ikki hudud ommaviy axborot vositalari vakillaridan iborat toʻrtta jamoa oʻzaro bellashdi.
Jizzax viloyatida xotin-qizlar oʻrtasida sogʻlom turmush tarzini targʻib qilish, sportga boʻlgan qiziqishni oshirish, shuningdek, hududlar oʻrtasidagi doʻstona hamkorlikni mustahkamlash maqsadida voleybol musobaqasi tashkil etildi.
«IIB boshligʻi kubogi» uchun oʻtkazilgan mazkur musobaqada Jizzax va Sirdaryo viloyatlarida faoliyat yuritayotgan ommaviy axborot vositalarida mehnat qiluvchi jurnalist ayollardan iborat toʻrtta jamoa ishtirok etdi.
Musobaqa davomida ishtirokchilar nafaqat sport mahorati, balki jamoaviy hamjihatlik, oʻzaro qoʻllab-quvvatlash va gʻalabaga boʻlgan intilishlarini ham namoyon etdilar.
Maydonda kechgan qizgʻin va murosasiz bahslar tomoshabinlarga koʻtarinki kayfiyat bagʻishladi. Har bir jamoa munosib natija koʻrsatish, raqiblaridan ustun kelish va kubok sohibi boʻlish uchun bor kuch-gʻayratini ishga soldi.
Voleybol bahslari davomida sportchilarning chaqqonligi, epchilligi va jamoaviy oʻyin olib borish mahorati yaqqol koʻzga tashlandi.
Musobaqa ishtirokchilari uchun bu tadbir nafaqat oʻz mahoratlarini sinovdan oʻtkazish, balki hamkasblar bilan yaqindan tanishish, tajriba almashish va doʻstona munosabatlarni mustahkamlash uchun ham oʻziga xos imkoniyat boʻldi.
Musobaqaning yakuniy natijalariga koʻra, uchinchi oʻrin Jizzax viloyati teleradiokompaniyasi jamoasiga nasib etdi. Ikkinchi oʻrinni Sirdaryo viloyatining «Yangi Sirdaryo» gazetasi jamoasi egalladi.
Faxrli birinchi oʻrin esa oʻzining munosib oʻyini va yuqori natijasi bilan ajralib turgan «Jizzax haqiqati — Djizakskaya pravda» gazetalari jamoasiga nasib etdi. Gʻolib jamoa «IIB boshligʻi kubogi» sohibi boʻldi.
Taqdirlash marosimida Jizzax viloyati IIB boshligʻi, voleybol federatsiyasi rahbari Gʻayrat Qodirov ishtirok etib, musobaqa gʻoliblari va sovrindorlarini samimiy tabrikladi.
Ushbu kabi sport tadbirlari jamoalar oʻrtasidagi hamkorlikni rivojlantirish, aholi, xususan, xotin-qizlar oʻrtasida jismoniy faollikni keng targʻib etishda muhim ahamiyat kasb etishi taʼkidlandi.
Marosim yakunida gʻolib va sovrindor jamoalarga qimmatbaho sovgʻalar topshirildi. Ishtirokchilarga kelgusi faoliyatida muvaffaqiyatlar, yangi yutuqlar va sport musobaqalarida yanada yuksak natijalar tilab qolindi.
Shu tariqa, «IIB boshligʻi kubogi» doirasidagi voleybol musobaqasi nafaqat sport bellashuvi, balki ikki viloyat jurnalist ayollarini bir maydonda jamlagan, doʻstlik, hamjihatlik va sogʻlom raqobat ruhini oʻzida mujassam etgan tadbir sifatida yodda qoldi.
Jizzax viloyati IIB Axborot xizmati