“Oqlov” — ichki ishlar xodimi qalbida milliy gʻurur va sadoqat, adolat va vijdon masʼuliyatini uygʻunlashtirgan hayotiy sahna asari
2026-10-19 08:25:00 / Yangiliklar
Oʻzbekiston davlat drama teatrida ichki ishlar organlari tashkil etilganining 35 yilligi munosabati bilan “Oqlov” spektaklining premyerasi boʻlib oʻtdi. Unda ichki ishlar vaziri oʻrinbosari, polkovnik Diyorbek Sattarov boshchiligida xodimlar va ularning oila aʼzolari, akademiya kursantlari hamda boʻlajak xodimlar ishtirok etdi.
Islom Hamro asari asosida Ichki ishlar vazirligi, Madaniyat vazirligi va Oʻzbekiston davlat drama teatri hamkorligida sahnalashtirilgan spektaklda inson taqdiri, nohaq ayblovning ogʻir oqibatlari hamda adolatni qaror toptirish masalalari badiiy talqin etilgan.
Mamlakatimizda inson qadrini ulugʻlash, uning huquq va erkinliklarini himoya qilish, qonun ustuvorligini taʼminlashga qaratilgan islohotlar mazmuni sahna asarida oʻz aksini topgan. Bosh qahramonning murakkab hayot yoʻli, haqiqat uchun kurashi va ruhiy kechinmalari tomoshabinlarni inson shaʼni, vijdon va masʼuliyat haqida mushohada yuritishga undaydi.
Spektaklda koʻtarilgan masalalar ichki ishlar organlari xodimlarining kundalik faoliyati bilan bevosita bogʻliq. Har bir murojaat ortida inson taqdiri turganini unutmaslik, vaziyatga xolis yondashish va qonunchilik talablariga qatʼiy rioya etish asarning asosiy gʻoyalari sifatida namoyon boʻladi.
Qahramonlarning tanlovi va xatti-harakatlari orqali halollik, mardlik hamda xizmat burchiga sadoqat fazilatlari yoritilgan. Bu, ayniqsa, boʻlajak xodimlarning tanlagan kasbi masʼuliyatini chuqurroq anglashi, inson taqdiriga daxldor har bir qarorga vijdonan yondashishida muhim tarbiyaviy ahamiyatga ega.
“Oqlov” milliy gʻurur va sadoqat inson qadrini asrash, adolatni himoya qilish va xizmat burchini halol ado etishda namoyon boʻlishini eslatadi. Zero, insonparvarlik har bir xodim uchun nafaqat kasbiy talab, balki vijdon amri boʻlishi lozim.