Surxondaryo viloyati IIBda toʻqqiz oylik faoliyat tanqidiy tahlil asosida sarhisob qilinib, aniq vazifalar belgilab olindi
2026-10-18 11:15:00 / Yangiliklar
Surxondaryo viloyati Ichki ishlar boshqarmasida Ichki ishlar vaziri oʻrinbosari, Ramazon Ashropov hamda viloyat IIB boshligʻi, Baxtiyor Inoqov ishtirokida 2026-yilning 9 oyi yakunlariga bagʻishlangan kengaytirilgan hisobot yigʻilishi oʻtkazildi.
Videoselektor tarzida tashkil etilgan yigʻilishda boshqarma rahbariyati, sohaviy xizmatlar, shahar-tuman ichki ishlar organlari rahbarlari va shaxsiy tarkib ishtirok etdi. Unda jinoyatchilikni “mahallabay” jilovlash, aholi muammolarini “fuqarobay” hal etish, kiberjinoyatchilik, huquqbuzarliklar profilaktikasi, jamoat tartibini saqlash, yoʻl harakati xavfsizligini taʼminlash hamda hududlarda kriminogen vaziyatni barqarorlashtirish borasida amalga oshirilgan ishlar tanqidiy ruhda tahlil qilindi.
Yigʻilishda Surxondaryo viloyati IIB boshligʻi oʻrinbosari, Joʻrabek Avazov tomonidan 2026-yilning toʻqqiz oyi davomida amalga oshirilgan ishlar yuzasidan hisobot taqdim etildi.
Tadbirda soʻz olgan Ichki ishlar vaziri oʻrinbosari Ramazon Ashropov Prezident qarorlari ijrosi, murojaatlar bilan ishlash, jinoyatchilikka qarshi kurashish samaradorligi, xizmat intizomi va qonuniylik masalalarini atroflicha tahlil qilib, kiberjinoyatlarning oldini olish, korrupsiya va tamagirlikning har qanday koʻrinishiga mutlaqo murosasiz munosabatda boʻlish, xodimlarning kasbiy va jangovar tayyorgarligini yanada oshirish boʻyicha aniq vazifalarni belgilab berdi.
Yigʻilish yakunida xizmat faoliyatida sustkashlik va kamchiliklarga yoʻl qoʻygan ayrim rahbar va xodimlar faoliyati tanqidiy koʻrib chiqildi, masʼuliyatni yanada oshirish hamda aholi tinchligi va xavfsizligini taʼminlash boʻyicha ustuvor vazifalar belgilab berildi.
Huquq-tartibotni taʼminlashda intizom, masʼuliyat va halollik - har bir xodimning eng asosiy burchidir.
IIV huzuridagi Tergov departamenti Axborot xizmati