O‘zbеkiston Rеspublikаsi Ichki ishlаr vаzirligi

Ichki ishlar organlari oldida turgan dolzarb vazifalar, jamoat xavfsizligini taʼminlash, huquqbuzarliklarning oldini olish hamda Davlatimiz rahbarining qaror va topshiriqlaridan kelib chiqib belgilangan chora-tadbirlar ijrosini tashkil etish masalalariga bagʻishlangan yigʻilish boʻlib oʻtdi.

Tadbirda Ichki ishlar vaziri, general-leytenant Aziz Tashpulatov boshchiligida vazir oʻrinbosarlari, sohaviy xizmat boshliqlari, hududiy ichki ishlar organlari rahbarlari hamda shaxsiy tarkib ishtirok etdi.

Yigʻilish kun tartibidan ichki ishlar organlarining xizmat faoliyati samaradorligini oshirish, xizmat intizomini mustahkamlash, uyushgan jinoyatchilikka qarshi kurashish, shu jumladan, giyohvandlik vositalarining noqonuniy aylanishi va isteʼmoli bilan bogʻliq holatlarning oldini olish, shuningdek, aholi oʻrtasida huquqbuzarliklar profilaktikasiga qaratilgan targʻibot tadbirlarini kuchaytirish masalalari oʻrin oldi.

Muhokamalar davomida joylardagi kriminogen vaziyatni chuqur tahlil qilish, jinoyatlarning sodir etilishiga imkon berayotgan shart-sharoit va omillarni barvaqt aniqlash, har bir mahallada xavfsiz muhitni shakllantirish hamda profilaktik choralarning taʼsirchanligini oshirish zarurligiga eʼtibor qaratildi.

Shuningdek, uyushgan jinoiy guruhlar faoliyatiga chek qoʻyish, giyohvandlik bilan bogʻliq huquqbuzarliklarga qarshi kurashish va bu borada aholining, ayniqsa, yoshlarning huquqiy ongi va masʼuliyatini oshirishga qaratilgan targʻibot ishlarini tizimli tashkil etish muhimligi taʼkidlandi.

Kun tartibidagi yana bir muhim masala kiberjinoyatchilikka qarshi kurashish, uning oldini olish va fosh etish borasida amalga oshirilgan ishlar tahliliga bagʻishlandi.

Ushbu yoʻnalishdagi faoliyat natijalari, mavjud kamchiliklar va ularning sabablari muhokama qilinib, kiberjinoyatlarning yangi usullarini aniqlash, fuqarolarning raqamli xavfsizligini taʼminlash, aholi oʻrtasida profilaktik tushuntirish ishlarini kuchaytirish, jumladan, «APK qoʻriqchi» dasturini keng targʻib qilish hamda sodir etilgan jinoyatlarni tezkor fosh etish borasidagi vazifalar belgilab olindi.

Kiberjinoyatchilikka qarshi kurashishda tezkor axborot almashinuvini yoʻlga qoʻyish, raqamli dalillar bilan ishlash samaradorligini oshirish va jinoyatlarni sodir etish usullarini muntazam tahlil qilib borish muhimligi taʼkidlandi.

Ayniqsa, fuqarolarning bank kartalari va shaxsiy maʼlumotlarini himoya qilish, internet orqali sodir etiladigan firibgarliklar haqida aholini oʻz vaqtida ogohlantirish hamda bunday jinoyatlardan jabrlanish holatlarini kamaytirishga qaratilgan profilaktik choralarni kuchaytirish zarurligi qayd etildi.

Yigʻilish yakunida kun tartibidagi masalalar yuzasidan masʼullarga tegishli vazifalar belgilanib, ularning ijrosini oʻz vaqtida va sifatli taʼminlash, yoʻl qoʻyilgan kamchiliklarni bartaraf etish hamda amalga oshirilayotgan chora-tadbirlar natijadorligi ustidan tizimli nazorat oʻrnatish zarurligi taʼkidlandi.