Buxoro viloyati IIB rahbariyati yangi maʼmuriy bino qurilishini koʻzdan kechirdi
2026-10-16 09:00:00 / Yangiliklar
Maʼlumki, bugungi kunda ichki ishlar organlari tizimida amalga oshirilayotgan islohotlarning tub mohiyati nafaqat xodimlar safini malakali kadrlar bilan toʻldirish, balki ularning samarali xizmat olib borishlari uchun zamon talablariga mos infratuzilmani yaratishga qaratilgan.
Shu maqsadda, Buxoro viloyati Ichki ishlar boshqarmasi uchun barpo etilayotgan yangi maʼmuriy binodagi qurilish-montaj ishlari ayni qizgʻin pallaga kirgan.
Viloyat IIB boshligʻi mazkur obyektga tashrif buyurib, bunyodkorlik ishlarining borishi, loyiha asosida amalga oshirilayotgan jarayonlar va qurilish materiallarining sifati bilan yaqindan tanishdi.
Tashrif davomida boshqarma boshligʻi qurilishga masʼul boʻlgan pudratchilar va muhandislar bilan bevosita muloqot qildi.
Suhbat chogʻida bino nafaqat koʻrkam va zamonaviy qiyofaga ega boʻlishi, balki uzoq yillar davomida xalqimizga va tizim xodimlariga beminnat xizmat qilishi lozimligi alohida taʼkidlandi.
Rahbar quruvchilar oldiga ikkita asosiy talabni qoʻydi.
Xususan, yangi binoda har bir gʻishtning toʻgʻri qoʻyilishidan tortib, pardozlash ishlarigacha xalqaro standartlarga toʻliq javob berishi shartligi, shuningdek, belgilangan muddatlarda ishlarni yakunlash, ammo shoshma-shosharlik evaziga sifatning tushib ketishiga aslo yoʻl qoʻymaslik zarurligi taʼkidlandi.
Tadbir davomida, binoda xodimlar va murojaat bilan keluvchi fuqarolar uchun yaratiladigan qulayliklar, raqamli texnologiyalarni joriy etish imkoniyatlari ham koʻzdan kechirildi.
Aniqlangan ayrim kamchiliklarni bartaraf etish va ish surʼatini oshirish yuzasidan masʼullarga tegishli koʻrsatmalar berildi.
Buxoro viloyati IIB Axborot xizmati