IIV Akademiyasida BMT global dasturi doirasida zaif nishonlarni terrorchilik harakatlaridan himoya qilishga bagʻishlangan maslahatlashuv ish boshladi
2026-10-16 09:00:00 / Yangiliklar
BMT Terrorizmga qarshi kurashish boshqarmasi (UNOCT), Terrorizmga qarshi kurashish qoʻmitasi ijroiya tuzilmasi (CTED), Markaziy Osiyoda preventiv diplomatiya boʻyicha mintaqaviy markazi (UNRCCA), shuningdek Yevropada xavfsizlik va hamkorlik tashkiloti (OSCE) mintaqaviy vakolatxonasi hamkorligida tashkil etilgan tadbirda xalqaro ekspertlar, mutaxassislar hamda manfaatdor tashkilotlar vakillari qatnashmoqda.
Uch kun davomida ishtirokchilar terrorizm bilan bogʻliq global muammolar, zamonaviy tahdid va xavf-xatarlar, ularga qarshi koʻrilayotgan choralar, mavjud imkoniyatlar va zaif nuqtalar, shuningdek aholi gavjum joylarda jamoat xavfsizligini taʼminlash, terrorchilik harakatlarining oldini olish, inson hayoti va infratuzilma obyektlarini muhofaza qilish yuzasidan fikr almashadilar.
Shuningdek terrorizmga qarshi kurashish boʻyicha milliy qonunchilik, masʼul idora va tashkilotlarning vazifalari, hamkorlik mexanizmlari tahlil qilinib, zamonaviy tahdidlarni baholash va bartaraf etishda mavjud salohiyatni oshirish, ilgʻor tajribalarni milliy amaliyotga tatbiq etishga qaratilgan xulosa va tavsiyalar ishlab chiqiladi.
IIV Akademiyasi Axborot xizmati