Ichki ishlar vazirligi va Islom sivilizatsiyasi markazi oʻrtasida hamkorlik memorandumi imzolanib, “Eng yaxshi kitobxon” tanlovi gʻoliblari taqdirlandi
2026-10-14 21:25:00 / Yangiliklar
Oʻzbekistondagi Islom sivilizatsiyasi markazida Ichki ishlar vazirligi va Markaz oʻrtasida oʻzaro hamkorlik memorandumi imzolandi. Shu tariqa, Ichki ishlar vazirligi huquqni muhofaza qiluvchi organlar orasida Markaz bilan tizimli hamkorlikni yoʻlga qoʻygan dastlabki tuzilmalardan biri boʻldi.
Tadbirda Ichki ishlar vaziri oʻrinbosari, polkovnik Diyorbek Sattarov, Oʻzbekistondagi Islom sivilizatsiyasi markazi direktori Firdavs Abduxoliqov, vazirlik va Markaz masʼul xodimlari hamda “Eng yaxshi kitobxon” koʻrik-tanlovining respublika bosqichi ishtirokchilari qatnashdi.
Soʻzga chiqqanlar davlatimiz rahbari tashabbusi bilan bunyod etilgan ushbu maskan xalqimizning boy tarixiy, ilmiy va maʼnaviy merosini chuqur oʻrganish va keng targʻib etish, ayniqsa, yosh avlodni Vatanga muhabbat, milliy gʻurur, tarixiy xotira va ajdodlar merosiga hurmat ruhida tarbiyalashda muhim maʼrifat maskani ekanini taʼkidladilar.
Imzolangan memorandumga muvofiq, ichki ishlar organlari xodimlari, kursant va tinglovchilarning tarixiy hamda maʼnaviy-maʼrifiy bilimlarini oshirish, ularda Vatanga sadoqat, milliy gʻurur va tarixiy xotira tuygʻularini mustahkamlash, buyuk alloma va mutafakkirlarimiz merosini chuqur oʻrganish yoʻnalishlarida tizimli hamkorlik olib boriladi. Shuningdek, Markazda maʼnaviyat soatlari, ochiq darslar, ilmiy-maʼrifiy uchrashuvlar va davra suhbatlarini tashkil etish, konferensiya va seminarlarni hamkorlikda oʻtkazish, xodimlar uchun ekskursiyalar uyushtirish, qoʻshma maʼrifiy, media va raqamli loyihalarni amalga oshirish boʻyicha kelishib olindi.
Tadbir doirasida ichki ishlar organlari xodimlari oʻrtasida oʻtkazilgan “Eng yaxshi kitobxon” koʻrik-tanlovining respublika bosqichi ham yakunlandi.
Koʻrik-tanlov yakunlariga koʻra, 3-oʻrinni Beruniy tumani IIBdan leytenant Elmira Oʻrozmatova, 2-oʻrinni Navoiy viloyati IIBdan kapitan Bunyod Toʻymurodov, 1-oʻrinni esa Toshkent shahar IIBBdan leytenant Kamronbek Ismoilov egalladi.
Gʻolib va sovrindorlar Ichki ishlar vazirligi rahbariyati tomonidan pul mukofotlari hamda qimmatbaho esdalik sovgʻalari bilan tantanali ravishda taqdirlandi.
Mazkur tadbir va hamkorlik memorandumi ichki ishlar organlarida kitobxonlik hamda mutolaa madaniyatini yuksaltirish, xodimlarning maʼnaviy-maʼrifiy salohiyatini oshirish, ularda milliy gʻurur, vatanparvarlik va xizmat burchiga sadoqat tuygʻularini yanada mustahkamlashga xizmat qiladi.