IIV rahbariyati tomonidan Andijon viloyatida kriminogen vaziyatni barqarorlashtirish borasida amalga oshirilayotgan ishlar oʻrganilib, 9 oy yakuni boʻyicha dolzarb vazifalar muhokama qilindi
2026-10-14 19:05:00 / Yangiliklar
Joriy yilning 13-oktyabr kuni Oʻzbekiston Respublikasi Ichki ishlar vazirining birinchi oʻrinbosari – Jamoat xavfsizligi departamenti boshligʻi, polkovnik Timur Ismailov tomonidan Andijon viloyatining tuman va shahar ichki ishlar boʻlinmalari faoliyati joylarga chiqqan holda oʻrganildi.
Oʻrganishlarda Prezident qarorlari va tashrif bayonlari, Vazirlik Hayʼati qarorlari ijrosi, shuningdek, avval berilgan topshiriqlarning bajarilishi va aniqlangan kamchiliklarni bartaraf etish boʻyicha amalga oshirilgan ishlarga alohida eʼtibor qaratildi.
Xususan, Shahrixon, Oltinkoʻl, Paxtaobod, Jalaquduq, Xoʻjaobod tumanlari hamda Andijon shahridagi qator “qizil” toifaga kiritilgan mahallalarda jinoyatlarning sodir etilish sabablari, ularga imkon bergan shart-sharoitlar va profilaktik ishlar holati oʻrganildi.
Ayrim mahallalarda yoshlar oʻrtasida jinoyatchilikning yuqoriligi, oʻgʻirlik sodir etilayotgan hududlarni aniqlash va tahlil qilish ishlari yetarli darajada tashkil etilmagani, janjalkash oilalar bilan profilaktik ishlarni jadallashtirilishi boʻyicha topshiriqlar berildi.
Aholi gavjum joylarni qoʻshimcha kameralashtirish, mavjud videokuzatuv kameralarini “Qalqon” dasturi hamda tezkor boshqaruv markazlariga integratsiya qilish boʻyicha vazifalar belgilandi.
Fuqarolarni “APK-qoʻriqchi” va “Mening inspektorim” mobil ilovalariga keng jalb etish, profilaktika inspektorlarining aholi bilan toʻgʻridan-toʻgʻri muloqotini kuchaytirish choralari belgilandi.
Jinoyatlar haqidagi xabarlarga profilaktika inspektorlari bilan birgalikda tezkor chiqishni taʼminlash maqsadida “Tezkor harakatlanuvchi guruhlar” faoliyatini yoʻlga qoʻyish boʻyicha topshiriqlar berildi.
Savdo markazlari, bozorlar va aholi gavjum joylarida xavfsizlikni taʼminlash, qoʻriqlash xizmati kuch va vositalaridan samarali foydalanish, davlat-xususiy sheriklik asosida hududlarni kameralashtirish imkoniyatlarini kengaytirish vazifalari belgilandi.
Oʻrganishlar yakunida aniqlangan kamchiliklarni bartaraf etish, berilgan topshiriqlarning ijrosini taʼminlash hamda Andijon viloyati hududida kriminogen vaziyatni barqarorlashtirish boʻyicha Andijon viloyati IIB rahbar va xodimlari ishtirokida muhokama yigʻilishi boʻlib oʻtdi.
Yigʻilishda har bir hudud kesimida mavjud muammolarni bartaraf etish, jinoyatlarning oldini olish, aholi xavfsizligini taʼminlash va profilaktik ishlarni kuchaytirish boʻyicha aniq vazifalar belgilab berildi.
Yigʻilish soʻngida jinoyat va huquqbuzarliklarni oldini olish va aholi osoyishtaligini taʼminlashda boshqa hamkasblariga alohida namuna koʻrsatib kelayotgan bir guruh ichki ishlar organlari xodimlar munosib taqdirlandilar.
Andijon viloyati IIB Axborot xizmati