IIV akademiyasi rahbariyati boshchiligidagi ishchi guruh Mirzo Ulugʻbek tumani mahallalariga chiqib, aholi uchun xavfsiz muhitni shakllantirish borasida amalga oshirilayotgan ishlar bilan tanishdi
2026-10-14 18:35:00 / Yangiliklar
Mahalladagi osoyishta muhit koʻp jihatdan jamoat xavfsizligini taʼminlash, kriminogen vaziyatga salbiy taʼsir koʻrsatayotgan omillarni barvaqt bartaraf etishga bogʻliq.
Ichki ishlar vazirligi akademiyasi rahbari Rustam Xatamov boshchiligidagi ishchi guruh Mirzo Ulugʻbek tumanining “Minglola”, “Sultoniya”, “Chimyon” va “Katta Qorasuv” mahallalariga chiqib, aholi uchun xavfsiz muhitni shakllantirish borasida amalga oshirilayotgan ishlar bilan tanishdi.
Oʻrganishlar davomida hududlarda sodir etilayotgan jinoyatlar, ularni keltirib chiqarayotgan sabab va sharoitlar, aholi oʻrtasida olib borilayotgan profilaktik ishlarning natijadorligi, jinoyatchilikni jilovlash masalalari atroflicha muhokama qilindi.
Akademiya boshligʻi “mahalla yettiligi” tizimi vakillari va faollar bilan muloqot qilib, oilalardagi ijtimoiy-maishiy muhitga eʼtibor qaratdi. Ayrim mahallalarda zoʻravonlik, bezorilik va boshqa jinoyatlar qayd etilayotgani, xavfsiz muhitni yaratish uchun muammolarni “xonadonbay”, “fuqarobay” tizim asosida oʻrganib, oʻz vaqtida hal qilish zarurligini taʼkidladi.
Profilaktik tadbirlar orqali fuqarolarning huquqiy ongini yuksaltirish, jinoyat uchun javobgarlikning muqarrarligini tushuntirish, kiberjinoyatlarning zamonaviy koʻrinishlari va sodir etilish usullaridan aholini muntazam ogoh etib borish, yoshlar nazoratsizligining oldini olish borasida vazifalar belgilandi. Shuningdek mahalla faollarining uyali aloqa vositalariga “APK Qoʻriqchi” ilovasi yuklab berilib, mahallalarda kiberxavfsizlik boʻyicha targʻibot ishlarini kuchaytirish yuzasidan amaliy tavsiyalar berildi.
Shundan soʻng ishchi guruh vakillari aholi gavjum joylarning kriminogen vaziyati bilan tanishib, jamoat tartibini saqlashga jalb qilingan kuch-vositalar faoliyatini oʻrgandi. Masʼullarga “jinoyat oʻchoq”lari sifatida belgilangan joylarda sutkalik nazoratni susaytirmaslik, “102” raqami orqali kelib tushayotgan murojaatlarga tezkorlik bilan munosabat bildirish, mahallalarda xavfsizlik choralarini kuchaytirish yuzasidan topshiriq berildi.
Oʻrganishlar yakunida kriminogen vaziyatni barqarorlashtirishga qaratilgan har bir yoʻnalish boʻyicha tegishli chora-tadbirlar belgilanib, nazoratga olindi.
IIV akademiyasi Axborot xizmati