Qoraqalpogʻiston Respublikasi Jo‘qorg‘i Kengesida “Qoraqalpogʻistondagi jinoyatchilikning ilmiy tahlili, tadqiqot natijalari va kelgusidagi ustuvor vazifalar” mavzusida muhokama yigʻilishi boʻlib oʻtdi
2026-10-13 12:35:00 / Yangiliklar
Tadbirda huquqni muhofaza qiluvchi organlar, tegishli davlat tashkilotlari masʼullari hamda Jo‘qorg‘i Kenges deputatlari ishtirok etdi. Yigʻilishda Oʻzbekiston Respublikasi Kriminologiya tadqiqot instituti tomonidan Vazirlar Mahkamasining 2024-yil 24-iyuldagi 445-son qarori hamda O‘zbekiston Respublikasi Prezidentining 2026-yil 5-yanvardagi PQ-1 va PQ-2-son qarorlari ijrosi doirasida amalga oshirilgan ishlar muhokama qilindi.
Shuningdek, Institut tomonidan amalga oshirilgan “Qoraqalpogʻiston Respublikasi jinoyatchiligini tadqiq qilish” ilmiy-amaliy tadqiqot loyihasining yakuniy natijalari taqdim etildi.
Tadqiqot doirasida Qoraqalpogʻiston Respublikasining 2021–2025-yillardagi kriminogen vaziyati, jinoyatchilikning asosiy tendensiyalari, uning kelib chiqishiga taʼsir etuvchi sabab va shart-sharoitlar hamda hududlarning oʻziga xos xususiyatlari kompleks tahlil qilindi.
Oʻrganishlar natijasida hududdagi kriminogen vaziyatga ilmiy baho berilib, jinoyatchilik rivojlanishining prognozlari ishlab chiqildi. Shuningdek, jinoyatchilikning oldini olish, huquqbuzarliklar profilaktikasi samaradorligini oshirish va mavjud profilaktika mexanizmlarini takomillashtirishga qaratilgan amaliy taklif va tavsiyalar ishlab chiqildi.
Muhokama davomida tadqiqot natijalaridan hududda jinoyatchilikning oldini olish va profilaktika ishlarini samarali tashkil etishda foydalanish masalalariga alohida eʼtibor qaratildi.
Yigʻilish yakunida ilmiy tadqiqot natijalarining kriminogen vaziyatni chuqur tahlil qilish, jinoyatchilikning sabab va shart-sharoitlarini aniqlash hamda profilaktika faoliyatini ilmiy asosda takomillashtirishdagi amaliy ahamiyati taʼkidlandi.
Oʻzbekiston Respublikasi Kriminologiya tadqiqot instituti