Davlat tili — milliy gʻurur va maʼnaviy qadriyatlar poydevori: IIVda navbatdagi maʼnaviy-maʼrifiy tadbir oʻtkazildi
2026-10-13 10:55:00 / Yangiliklar
21-oktyabr — Oʻzbek tili bayrami kuni hamda «Davlat tili haqida»gi Qonun qabul qilinganining 37 yilligi munosabati bilan IIV Madaniyat saroyida navbatdagi «Maʼrifat» hamda «Milliy gʻurur va sadoqat» soati oʻtkazildi.
«Davlat tili — milliy gʻurur va maʼnaviy qadriyatlar poydevoridir» mavzusidagi tadbirda IIV shaxsiy tarkibi, jumladan, vazirlik Markaziy apparati va tarkibiy boʻlinmalari xodimlari, Respublika Maʼnaviyat va maʼrifat markazi vakillari, madaniyat va sanʼat namoyandalari ishtirok etdi.
Ona tilimizning tarixi va boy maʼnaviy merosiga bagʻishlangan videorolik namoyishidan soʻng, maʼruzachilar oʻzbek tilining jamiyat hayotidagi oʻrni, uning nufuzini yuksaltirish va yosh avlodda ona tiliga hurmat tuygʻusini shakllantirish haqida fikr yuritdilar. Tilni asrash milliy oʻzlik, tarixiy xotira va qadriyatlarni asrash bilan chambarchas bogʻliq ekani taʼkidlandi.
Ishtirokchilar «Yangi Oʻzbekiston shukronaligi» loyihasi doirasidagi maʼrifiy fotokoʻrgazma bilan ham tanishdilar. Madaniyat saroyi ansambli xonandalari ijrosidagi kuy-qoʻshiqlar uchrashuvga koʻtarinki ruh bagʻishladi.
Tadbir xodimlarning maʼnaviy dunyoqarashini boyitish, ona tiliga hurmat, milliy gʻurur va Vatanga sadoqat tuygʻularini mustahkamlashga qaratildi.