Toshkent shahar Chilonzor tumanida eng yaxshi profilaktika inspektori aniqlandi
2026-10-13 10:30:00 / Yangiliklar
Toshkent shahar ichki ishlar organlari xodimlarining kasbiy va jangovar tayyorgarligini oshirish, xizmatga oid bilim va koʻnikmalarini sinovdan oʻtkazish hamisha rahbariyatning diqqat markazida. Holbuki, xodimlarning xizmatga shayligi, bilimi, koʻnikma va mahorati ish samaradorligini oshirilishi, xizmat vazifalarini bekam-u koʻst bajarilishini kafolatlaydi. Poytaxt IIBB sohaviy xizmatlari oʻrtasida turli tanlov va musobaqalarning oʻtkazilishi nafaqat oʻz kasbining bilimdoni, yetuk mutaxassisini aniqlash, shaxsiy tarkib oʻrtasida ijobiy raqobatni shakllantirish, jamoaviy muhit ishchanligini kuchaytirish, balki hamkasblariga oʻrnak koʻrsatish, munosiblarni ragʻbatlantirish orqali bilim va malakalarini oshirish ishtiyoqini shakllantiradi. “Ichki ishlar organlarida eng yaxshi xodimlarni aniqlash boʻyicha respublika tanlovini tashkil etish chora-tadbirlari toʻgʻrisida"gi Oʻzbekiston Respublikasi Vazirlar Mahkamasining qaroriga koʻra, poytaxtning Chilonzor tumani IIO FMB tomonidan “Eng yaxshi profilaktika inspektori” koʻrik-tanlovi oʻtkazildi.
Hakamlar tanlovda qatnashgan xodimlarning musobaqa shartlarini bajarish, sohaga oid meʼyoriy hujjatlarni ish jarayonida qoʻllash, xizmat faoliyati boʻyicha tayyorlangan taqdimnomalarni chuqur oʻrganib, quyidagilarni gʻolib deb topishdi.
3-oʻrinni 4-son IIB HPB profilaktika inspektori, katta leytenant Qurbonboyev Farrux Hosilbek oʻgʻli egalladi. 2-oʻrin esa 1-son IIB HPB profilaktika katta inspektori, kapitan Bozarov Bekzod Bahodir oʻgʻliga nasib etdi. Musobaqaning mutloq gʻolibi – birinchi oʻrin sohibi deb 2-son IIB HPB profilaktika inspektori, leytenant Normatov Shahzod Numonjon oʻgʻli eʼtirof etildi.
Gʻoliblarga tegishli diplom va esdalik sovgʻalari hamda poytaxt IIBB tomonidan oʻtkaziladigan koʻrik-tanlovga yoʻllanma topshirildi.
Toshkent shahar IIBB Axborot xizmati