Sirdaryo viloyati IIB rahbariyati tomonidan Guliston shahrida jamoat xavfsizligini taʼminlash va jinoyatchilikning oldini olish borasidagi ishlar oʻrganildi
2026-10-07 09:00:00 / Yangiliklar
Sirdaryo viloyati Ichki ishlar boshqarmasi boshligʻi, polkovnik Sardor Mirzaraimov tomonidan Guliston shahrida mahallalar kesimida jinoyat va huquqbuzarliklarning oldini olish, Jamoat xavfsizligini taʼminlash hamda aholi bilan manzilli ishlash borasida amalga oshirilayotgan ishlar holati oʻrganildi.
Oʻrganishlar dastlab “Bogʻishamol” mahalla fuqarolar yigʻinida olib borilib, “mahalla yettiligi” faoliyati, xususan, profilaktika inspektori hamda koʻchaboshilar oʻrtasidagi hamkorlik holati tahlil qilindi.
Shuningdek, profilaktika inspektorining xizmat faoliyatiga oid hujjatlar, kunlik arizalar va fuqarolar murojaatlari bilan ishlash jarayoni koʻzdan kechirildi.
“Shodlik” mahalla fuqarolar yigʻinida ham profilaktika inspektorining xizmat faoliyati, hududda Jamoat xavfsizligini taʼminlash, jinoyat va huquqbuzarliklarning barvaqt oldini olish, fuqarolar murojaatlarini oʻrganish hamda kunlik ish yurituvidagi arizalar bilan ishlash holatiga alohida eʼtibor qaratildi.
Oʻrganish davomida profilaktika inspektorining xizmat uyi ham koʻzdan kechirilib, xodim uchun yaratilgan shart-sharoitlar, xizmat vazifalarini samarali amalga oshirishi uchun mavjud imkoniyatlar oʻrganildi.
Shuningdek, 1-sonli Ichki ishlar boʻlimida xodimlar uchun yaratilgan xizmat sharoitlari, mavjud imkoniyatlar bilan ham tanishildi.
“Obod yurt” mahallasida istiqomat qiluvchi ehtiyojmand oila xonadoniga ham borilib, Ichki ishlar organlari koʻmagida qurilish ishlari koʻzdan kechirildi.
Oʻrganishlar yakunida hududlarda jinoyat va huquqbuzarliklarning oldini olish, aholi osoyishtaligini taʼminlash, jamoat xavfsizligini yanada mustahkamlash yuzasidan masʼullarga aniq topshiriq va vazifalar belgilab berildi.
Sirdaryo viloyati IIB Axborot xizmati