Andijonda “Uch avlod” konferensiyasi: ustozlar tajribasi yoshlar bilan baham ko‘rildi, faol faxriylar va tanlov g‘oliblari taqdirlandi
2026-10-06 22:05:00 / Yangiliklar
“Keksalar haftaligi” doirasida o‘tkazilgan konferensiyada vazirlik mas’ullari, Faxriylar kengashi vakillari, hududiy ichki ishlar organlari faxriylari va yosh xodimlar ishtirok etdi. Tadbirlar ustozlar mehnatini e’zozlash, ularning hayotiy va kasbiy tajribasini yosh avlodga yetkazishga qaratildi.
Yakuniy marosimda Ichki ishlar vaziri o‘rinbosari, polkovnik Diyorbek Sattarov davlatimiz rahbari boshchiligida “Inson qadri uchun” tamoyili asosida amalga oshirilayotgan islohotlar, ichki ishlar organlariga qaratilayotgan e’tibor va faxriylarga ko‘rsatilayotgan g‘amxo‘rlikka to‘xtaldi. Ustozlarning tajribasi va shaxsiy namunasi yosh xodimlarni Vatanga sadoqat hamda kasbiy mas’uliyat ruhida tarbiyalashda muhim o‘rin tutishi ta’kidlandi.
Konferensiya davomida faxriylar va yosh xodimlar mahallalarda huquqbuzarliklar hamda jinoyatchilikning oldini olish, aholi bilan muloqot va profilaktik ishlarni tashkil etish yuzasidan tajriba almashdi. Shuningdek, soha fidoyilari holidan xabar olinib, ularning xizmat xotiralari va maslahatlari tinglandi.
Iste’fodagi general-mayor Tohir Mullajonov IIV Andijon akademik litseyi o‘quvchilari hamda Andijon shahar IIB xodimlari bilan uchrashib, Vatanga sadoqat, xizmat intizomi va kasbiy mas’uliyat haqida suhbatlashdi. Tadbirda ichki ishlar organlarida 31 yil xizmat qilgan 93 yoshli iste’fodagi polkovnik Tursinbek Rahmonov ham faol ishtirok etdi.
Faxriylar va yosh xodimlar o‘rtasida o‘tkazilgan “Zakovat” intellektual o‘yinida Andijon viloyati IIB jamoasi birinchi, Navoiy viloyati IIB jamoasi ikkinchi, Sirdaryo viloyati jamoasi uchinchi o‘rinni egalladi.
“Yilning eng faol faxriy xodimi” tanlovining respublika bosqichida Sodiqjon Nishanov birinchi, Abduvahobjon Xalikov ikkinchi, Zakir Xudaymurodov uchinchi o‘ringa munosib topildi. Birinchi o‘rin sohibiga ikki kishilik bepul sanatoriy yo‘llanmasi, ikkinchi va uchinchi o‘rin sohiblariga tegishlicha bazaviy hisoblash miqdorining o‘n ikki va sakkiz baravari miqdorida pul mukofotlari berildi.
Diyorbek Sattarov faxriylar va g‘oliblarga mukofotlarni topshirib, ularning ko‘p yillik xizmati hamda yosh avlod tarbiyasiga qo‘shayotgan hissasi uchun minnatdorlik bildirdi. “Zakovat” g‘oliblari ham diplom va sovg‘alar bilan taqdirlandi.
Konferensiya ustoz-shogird an’analarini davom ettirish, faxriylar tajribasini xizmat amaliyotiga tatbiq etish va avlodlar hamkorligini mustahkamlashga xizmat qildi.