O‘zbеkiston Rеspublikаsi Ichki ishlаr vаzirligi

Ichki ishlar vaziri oʻrinbosari, general-mayor Baxodir Mirzaraximov Toshkent shahri Mirobod tumanida barpo etilayotgan yangi koʻp qavatli uy-joy majmualaridagi qurilish ishlarining borishi bilan tanishib, obyektlarda jamoat xavfsizligini taʼminlash masalalariga alohida eʼtibor qaratdi.

Tashrif davomida «Yangi Mirobod» mahallasi yettiligining xizmat faoliyati ham oʻrganilib, hududda jamoat tartibini saqlash, fuqarolar xavfsizligini taʼminlash, profilaktik tadbirlarni samarali tashkil etish hamda aholi bilan manzilli ishlash holati koʻzdan kechirildi.

Shuningdek, qurilish obyektlarida mehnat qilayotgan quruvchilarning xavfsizligini taʼminlash, ular oʻrtasida huquqbuzarliklarning oldini olish, mehnat va kundalik faoliyat jarayonida xavfsizlik qoidalariga amal qilish boʻyicha profilaktik tadbirlar oʻtkazilishiga eʼtibor qaratildi.

Ayniqsa, koʻp qavatli binolar qurilishi jarayonida jamoat xavfsizligini taʼminlash, qurilish maydonlarida tartib-intizomni saqlash, ishchi-xodimlar hamda atrofdagi fuqarolar xavfsizligini taʼminlash muhim vazifalardan biri ekani taʼkidlandi.

Zero, amalga oshirilayotgan har bir bunyodkorlik ishining zamirida, avvalo, xalqimiz uchun munosib va xavfsiz yashash sharoitlarini yaratish, fuqarolarimizning osoyishta va farovon hayotini taʼminlash maqsadi mujassam.

Taʼkidlanganidek, jamoat xavfsizligini taʼminlashda profilaktika va fuqarolar bilan yaqin hamkorlik muhim ahamiyat kasb etadi. Ayniqsa, yangi qurilishlar jadal olib borilayotgan hududlarda aholi, quruvchilar va masʼul tashkilotlar oʻrtasida hamjihatlikni taʼminlash xavfsiz muhitni shakllantirishga xizmat qiladi.

Mazkur yoʻnalishdagi ishlar izchil davom ettirilib, «Yangi Mirobod» mahallasida jamoat xavfsizligini taʼminlash, fuqarolar osoyishtaligini asrash hamda quruvchilar bilan profilaktik tadbirlarni kuchaytirishga alohida eʼtibor qaratiladi.

IIV Transport va turizm obyektlarida xavfsizlikni taʼminlash departamenti