BAAdan Oʻzbekistonga xalqaro qidiruvda boʻlgan olti nafar fuqaro ekstraditsiya qilindi
2026-10-05 17:35:00 / Yangiliklar
Xalqaro politsiya hamkorligi yoʻnalishida izchil va muvofiqlashtirilgan ishlarning natijasi oʻlaroq, Birlashgan Arab Amirliklaridan Oʻzbekiston Respublikasiga turli ogʻirlikdagi jinoyatlarni sodir etganlikda gumonlanib, Interpol kanallari orqali xalqaro qidiruvda boʻlgan Oʻzbekiston Respublikasining olti nafar fuqarosi ekstraditsiya qilindi.
Mazkur ekstraditsiya Interpolning Oʻzbekiston Respublikasidagi Milliy markaziy byurosi va BAAdagi Milliy markaziy byurosi oʻrtasida yoʻlga qoʻyilgan koʻp yillik hamkorlik, shuningdek, ikki davlat vakolatli organlari oʻrtasidagi toʻgʻridan-toʻgʻri ishchi aloqalarni mustahkamlash borasida olib borilayotgan tizimli ishlarning amaliy natijasidir.
Ushbu hamkorlikni rivojlantirishda ikki davlat byuro vakillarining xalqaro maydonlardagi muntazam ishchi uchrashuvlari va muloqotlari, jumladan, Interpol Bosh Assambleyasi, Interpol Milliy markaziy byurolari rahbarlarining uchrashuvlari hamda boshqa xalqaro tadbirlar doirasidagi aloqalari muhim ahamiyat kasb etmoqda. Mazkur uchrashuvlar davomida erishilgan kelishuvlar va yoʻlga qoʻyilgan ishchi aloqalar mamlakat hududidan tashqarida yashirinib yurgan shaxslarni qidirish va qaytarish boʻyicha axborot almashinuvini tezkor amalga oshirish hamda harakatlarni samarali muvofiqlashtirish imkonini bermoqda.
Oʻzbekiston va BAA Interpol Milliy markaziy byurolarining muvofiqlashtirilgan harakatlari, shuningdek, ikki davlat vakolatli organlarining oʻzaro hamkorligi natijasida zarur tartib-taomillar amalga oshirilib, xalqaro qidiruvda boʻlgan olti nafar fuqaroni Oʻzbekiston Respublikasiga ekstraditsiya qilish taʼminlandi.
Joriy yil boshidan buyon IIV Interpol MMB tashabbusi bilan qidiruvda boʻlgan 16 nafar shaxs BAAdan Oʻzbekistonga ekstraditsiya qilindi.
Mazkur natija Interpol yoʻnalishi boʻyicha xalqaro hamkorlikning amaliy samaradorligini yaqqol namoyon etib, transmilliy jinoyatchilikka qarshi kurashish, shuningdek, jinoyat sodir etgan shaxslarning javobgarlikdan qochib qutulishiga yoʻl qoʻymaslikda ikki davlat huquqni muhofaza qiluvchi organlari oʻrtasidagi barqaror ishchi aloqalarning muhim ahamiyatga ega ekanini yana bir bor tasdiqlaydi.
Interpolning Oʻzbekiston Respublikasidagi Milliy markaziy byurosi xorijda yashirinib yurgan shaxslarning turgan joyini aniqlash hamda ularni qonunchilikda belgilangan tartibda Oʻzbekiston Respublikasiga qaytarish borasidagi ishlarni izchil davom ettirmoqda.
Interpolning Oʻzbekiston Respublikasidagi Milliy markaziy byurosi