Ichki ishlar vazirligi akademiyasida taʼlim olayotgan tinglovchilar ilgʻor tajribalarni oʻrganish maqsadida Qatar davlatida boʻldi
2026-10-03 11:00:00 / Yangiliklar
Xorij safarida jamoat xavfsizligini taʼminlash va jinoyatchilikka qarshi kurashishda qoʻllanilayotgan innovatsion yondashuvlar, sunʼiy intellekt va raqamli texnologiyalar, zamonaviy xavf-xatarlarning oldini olish boʻyicha eng ilgʻor tajribalar oʻrganildi.
Oʻzaro manfaatli hamkorlik doirasida tashkil etilgan mashgʻulotlar davomida qatarlik mutaxassislar tomonidan kibertahdidlarni bartaraf etish, ochiq manbalar asosida maʼlumotlarni izlash va tahlil qilish, blokcheyn va kriptovalyutalar bilan bogʻliq noqonuniy operatsiyalarni aniqlash, moliyaviy firibgarliklarni fosh etish, shubhali tranzaksiyalarni kuzatish hamda jinoiy daromadlarni legallashtirish holatlarini hujjatlashtirish boʻyicha mashgʻulotlar oʻtkazildi.
Shu bilan birga, sunʼiy intellekt imkoniyatlaridan foydalangan holda kriminogen xavflarni baholash va tahlil qilish, jinoyatchilikka qarshi samarali kurashish, raqamli texnologiyalar yordamida jamoat xavfsizligini taʼminlash borasida yoʻlga qoʻyilgan eng soʻnggi yutuqlar oʻrganildi.
Oʻquv kursi yakunida politsiya akademiyasi boshligʻi Naif Muhammad Al-Manai Oʻzbekiston va Qatar Ichki ishlar vazirliklari oʻrtasidagi hamkorlikning amaliy samarasini eʼtirof etib, hozirgi global sharoitda tajriba almashinuvini kuchaytirish va kadrlar salohiyatini oshirib borish muhimligi alohida taʼkidladi. Tinglovchilarga maxsus sertifikatlarni topshirdi.
Xorij safari kiberxavfsizlik, raqamlashtirish, sunʼiy intellekt va axborot texnologiyalari boʻyicha zamonaviy bilim va koʻnikmalarni oʻzlashtirishda muhim ahamiyat kasb etdi.
IIV akademiyasi Axborot xizmati