“Eng yaxshi tergovchi” va “Eng yaxshi tergov jamoasi” koʻrik-tanlovining respublika bosqichi yakunlandi
2026-10-03 10:15:00 / Yangiliklar
Ichki ishlar vazirligi huzuridagi Tergov departamentining quyi boʻlinmalarida xizmat qilayotgan surishtiruvchilar va tergovchilar oʻrtasida “Eng yaxshi tergovchi” va “Eng yaxshi tergov jamoasi” nominatsiyalari boʻyicha koʻrik-tanlovning respublika bosqichi boʻlib oʻtdi.
Koʻrik-tanlov ichki ishlar organlari tergov boʻlinmalari shaxsiy tarkibining kasbiy tayyorgarligini takomillashtirish, bilim saviyasini oshirish, xizmat, jangovar va jismoniy tayyorgarligini kuchaytirish hamda amaliy koʻnikmalarini baholash maqsadida tashkil etildi.
Respublika bosqichida hududiy bosqichlarda birinchi, ikkinchi va uchinchi oʻrinlarni egallagan xodimlar ishtirok etdilar. Bellashuvlar xodimlar hamda hududiy boʻlinmalar jamoalari oʻrtasida oʻtkazildi.
Ishtirokchilar quyidagi beshta shart boʻyicha bahslashdilar:
-jismoniy tayyorgarlik — turnikda tortilish, 100 va 3000 metr masofalarga yugurish;
-jangovar tayyorgarlik — pistoletni toʻliqsiz qismlarga ajratish va yigʻish hamda quroldan oʻq otish;
-intellektual va individual psixologik xususiyatlarni aniqlashga qaratilgan test sinovlari;
-bilim darajasini aniqlashga qaratilgan test sinovlari;
-nazariy bilimlarni suhbat orqali baholash.
Suhbat davomida ishtirokchilarning Oʻzbekiston Respublikasining Jinoyat va Jinoyat-protsessual kodekslarini amaliyotda qoʻllash, Oliy sud Plenumi qarorlari va boshqa normativ-huquqiy hujjatlar, ichki ishlar organlari faoliyatiga oid xalqaro huquqiy normalar boʻyicha bilimlari baholandi. Shuningdek, dastlabki tergov jarayonida inson huquqlarini taʼminlash hamda xizmat faoliyatida qonuniylikni mustahkamlashga qaratilgan chora-tadbirlar yuzasidan bilim saviyasi sinovdan oʻtkazildi.
Qizgʻin va murosasiz bahslar yakunida eng yaxshi ishtirokchilar aniqlanib, koʻrik-tanlovning joriy yilgi respublika bosqichi yakunlandi.
Eslatib oʻtamiz, Oʻzbekiston Respublikasi Vazirlar Mahkamasining 2021-yil 24-avgustdagi “Ichki ishlar organlarida eng yaxshi xodimlarni aniqlash boʻyicha respublika tanlovini tashkil etish chora-tadbirlari toʻgʻrisida”gi 539-son qaroriga muvofiq, tanlov gʻoliblarini har yili 25-oktyabr — Ichki ishlar organlari xodimlari kunini nishonlash chogʻida eʼlon qilish belgilangan.
IIV huzuridagi Tergov departamenti