Yoshlar jinoyatchiligining oldini olish va manzilli profilaktika samaradorligini oshirish masalalari muhokama qilindi
2026-10-03 10:00:00 / Yangiliklar
Namangan viloyati hokimligida yoshlar oʻrtasida jinoyatchilik va huquqbuzarliklarning barvaqt oldini olishga bagʻishlangan videoselektor yigʻilishi oʻtkazildi. Unda viloyat hokimi Shavkatjon Abdurazzoqov, huquqni muhofaza qiluvchi organlar rahbarlari, mutasaddi tashkilotlar vakillari, masʼullar hamda yoshlarga biriktirilgan xodimlar ishtirok etdi.
Yigʻilishda hududlarda yoshlar bilan ishlash, ularni salbiy taʼsirlardan asrash va boʻsh vaqtini mazmunli tashkil etish borasida amalga oshirilgan ishlar tahlil qilindi. Ayniqsa, otaliqqa olingan yoshlarning muammolarini oʻrganish, ehtiyojlaridan kelib chiqib manzilli yordam koʻrsatish hamda profilaktika choralarining natijadorligini oshirish masalalariga alohida eʼtibor qaratildi.
Yoshlar tomonidan sodir etilayotgan jinoyat va huquqbuzarliklarning sabablari hamda ularga imkon berayotgan shart-sharoitlarni barvaqt aniqlash va bartaraf etish masalalari muhokama qilindi. Bu borada ichki ishlar organlari, mahalla, taʼlim muassasalari va oilalar oʻrtasidagi hamkorlikni kuchaytirish ustuvor vazifa sifatida belgilandi.
Har bir hududdagi mavjud muammolardan kelib chiqib, yoshlar bilan individual ishlash samaradorligini oshirish, masʼullarning shaxsiy javobgarligini kuchaytirish hamda belgilangan chora-tadbirlarning oʻz vaqtida va sifatli ijrosini taʼminlash yuzasidan tegishli topshiriqlar berildi.
Namangan viloyati IIB Axborot xizmati