IIV Ixtisoslashtirilgan maktab-internatida 1-oktyabr — Oʻqituvchi va murabbiylar kuniga bagʻishlangan videoselektor yigʻilishi va bayram tadbiri oʻtkazildi
2026-10-01 14:00:00 / Yangiliklar
Ustoz — yosh avlodning dunyoqarashi, maʼnaviyati va kelajakdagi kasbiy salohiyatini shakllantiruvchi ulugʻ kasb egasidir. Shu bois yurtimizda oʻqituvchi va murabbiylar mehnatini qadrlashga alohida eʼtibor qaratilmoqda.
Ichki ishlar vazirligi tizimida ham taʼlim sohasini rivojlantirish, yoshlarga zamonaviy bilim berish va ularni Vatanga sadoqat ruhida tarbiyalash borasida izchil ishlar amalga oshirilmoqda.
Xususan, IIV Ixtisoslashtirilgan maktab-internati, 14 ta akademik litsey hamda Nukus shahridagi “Temurbeklar maktabi”da 6 ming 358 nafar yoshga 616 nafar ustoz va murabbiy taʼlim-tarbiya bermoqda.
2026-yil 26-avgustdagi PQ–303-son qaror asosida kadrlar tayyorlashning “Maktab — litsey — texnikum — Akademiya — malaka oshirish” tamoyiliga asoslangan yaxlit ekotizimi yoʻlga qoʻyildi.
30-sentyabr kuni IIV Ixtisoslashtirilgan maktab-internatida 1-oktyabr — Oʻqituvchi va murabbiylar kuniga bagʻishlangan videoselektor yigʻilishi va bayram tadbiri oʻtkazildi.
Tadbirda Ichki ishlar vaziri oʻrinbosari, polkovnik Diyorbek Sattarov ishtirok etib, ustoz va murabbiylarni kasb bayrami bilan samimiy qutladi hamda Oʻzbekiston Respublikasi ichki ishlar vazirining bayram tabrigini oʻqib eshittirdi. Tabrikda ustozlarning yosh avlodni vatanparvarlik, qonunga hurmat va yuksak maʼnaviyat ruhida tarbiyalashdagi muhim oʻrni alohida taʼkidlandi.
Tantanali qismda taʼlim va tarbiya sohasida samarali mehnat qilib kelayotgan 150 ga yaqin ustoz va murabbiy Vazirlikning idoraviy hamda pul mukofotlari bilan taqdirlandi. Mukofotlar vazir oʻrinbosari tomonidan tantanali ravishda topshirildi.
Shuningdek, hududlardagi taʼlim muassasalarida faoliyat yuritayotgan ustoz va murabbiylar ham mazkur buyruq asosida munosib ragʻbatlantirilgani qayd etildi.
Bayram tadbiri ustoz va murabbiylarga bildirilgan samimiy tilaklar, yuksak ehtirom va koʻtarinki ruhda yakunlandi.