Mintaqada xavfsizlikni mustahkamlash sari muhim odim: Ichki ishlar vazirligi delegatsiyasi Dushanbe shahrida boʻlib oʻtgan MDHga aʼzo davlatlar ichki ishlar vazirlari Kengashining navbatdagi majlisida ishtirok etdi
2026-10-02 09:30:00 / Yangiliklar
Oʻzbekiston Respublikasi Ichki ishlar vaziri general-leytenant Aziz Tashpulatov boshchiligidagi delegatsiya joriy yilning 1-oktyabr kuni Dushanbe shahrida boʻlib oʻtgan Mustaqil davlatlar hamdoʻstligiga aʼzo davlatlar ichki ishlar vazirlari Kengashining anʼanaviy navbatdagi yigʻilishida qatnashdilar.
Tadbir doirasida delegatsiya rahbarlarini Tojikiston Respublikasi Prezidenti Emomali Rahmon qabul qildi.
Uchrashuvda tomonlar xalqaro maydonda terrorizm, ekstremizm, narkotrafik va uyushgan jinoyatchilikka qarshi kurashish, shuningdek, kiberxavfsizlik, noqonuniy migratsiya va turistlarni xavfsizligini taʼminlash sohalarida hamkorlik mexanizmlarining samaradorligini oshirish masalalari muhokama qilindi.
Tojikiston davlat rahbari MDH davlatlarining oʻzaro iqtisodiy va siyosiy hamkorligi, shu jumladan huquqni muhofaza qilish yoʻnalishidagi aloqalari takomillashib yuqori darajaga koʻtarilayotganligidan mamnunlik bildirib, bu masalada mintaqaviy hamjihatlik va muvofiqlashtirilgan yondashuvlarni kuchaytirish zarurligini qayd etdi.
Shundan soʻng Ichki ishlar vazirlarining Kengashi oʻz ishini boshladi.
Yigʻilishida Oʻzbekiston Respublikasi bilan birgalikda xalqaro hamkorlar Ozarbayjon, Armaniston, Belarus, Qozogʻiston, Qirgʻiziston, Rossiya, Tojikiston va Turkmaniston ichki ishlar vazirliklari rahbarlari, shuningdek, MDHga aʼzo davlatlar hududida uyushgan jinoyatchilik va boshqa xavfli jinoyatlarga qarshi kurashni muvofiqlashtirish Byurosi, Hamdoʻstlik mamlakatlarining Ijroiya qoʻmitasi va Aksilterror markazi masʼullari qatnashdilar.
Tomonlar MDH doirasidagi koʻp tomonlama hamda ikki tomonlama hamkorlikning ustuvor masalalarini, shuningdek, MDH mamlakatlari ichki ishlar vazirliklari Kengashi doirasida qabul qilingan 2029–2033-yillarda jinoyatchilikka qarshi kurashish boʻyicha qoʻshma chora-tadbirlar boʻyicha Davlatlararo dasturini amalga oshirishga doir masalalarni muhokama qildilar.
Tadbir jarayonida bir qator masalalar yuzasidan tegishli hujjatlar imzolandi, jumladan, mintaqa ichki ishlar organlarining axborotlarni elektron almashish sohasidagi hamkorligi, jinoyatchilikka qarshi kurashish yoʻnalishida genom maʼlumotlarini almashish, noqonuniy migratsiyaga qarshi kurashish sohasidagi hujjatlarni takomillashtirish, shaxslarni davlatlararo qidiruvini amalga oshirishdagi hamkorligini rivojlantirish, axborot-kommunikatsiya texnologiyalaridan foydalangan holda sodir etilgan hamda boshqa turdagi transmilliy jinoyatlar bilan kurashish borasidagi hamkorlikning istiqbolli yoʻnalishlari va boshqalar.
Shu bilan birga, Oʻzbekiston tomonidan kiritilgan muhim tashabbus “Mustaqil Davlatlar Hamdoʻstligiga aʼzo davlatlar ichki ishlar vazirliklarining kiberjinoyatchilikka qarshi kurashish boʻlinmalari rahbarlari yigʻilishlarini tashkil etish toʻgʻrisida”gi qaror Kengash aʼzolari tomonidan bir ovozda maʼqullanib, imzolandi.
Mazkur tashabbus zamonaviy kiberjinoyatchilikning transchegaraviy xususiyatidan kelib chiqib, byurokratik jarayonlarni qisqartirgan holda tezkor boʻgʻin rahbarlari oʻrtasida toʻgʻridan-toʻgʻri va ishonchli muloqotni yoʻlga qoʻyishga qaratilgan.
Muntazam uchrashuvlar ilgʻor tajriba almashish, axborot texnologiyalari sohasidagi tahdidlarni tahlil qilish va virtual makonda transmilliy jinoyatchilikka qarshi samarali choralarni ishlab chiqish imkonini beradi.
Tadbirlar doʻstona va konstruktiv ruhda oʻtgan boʻlib, tomonlar kelgusidagi aloqalarni institutsional darajada rivojlantirishga, amaliy natijalarga yoʻnaltirilgan qoʻshma loyihalarni amalga oshirishga kelishib oldilar.