1-oktyabr — Oʻqituvchi va murabbiylar kuni munosabati bilan ichki ishlar organlarida “Yilning eng yaxshi murabbiyi” tanlovi oʻtkazildi
2026-10-01 13:00:00 / Yangiliklar
Ichki ishlar organlarida yosh xodimlarni kasbga sadoqatli, bilimli va malakali kadrlar etib tarbiyalashda ustoz va murabbiylarning oʻrni beqiyos.
Zero, bugun yosh xodimdan xizmat vazifalarini puxta bajarish bilan birga, oʻz ustida muntazam ishlash, zamonaviy bilim va koʻnikmalarni egallash, tashabbuskorlik hamda masʼuliyat bilan faoliyat yuritish talab etilmoqda. Bu jarayonda ustozning tajribasi, shaxsiy namunasi va yoʻl-yoʻrigʻi shogird kamolotining muhim tayanchidir.
1-oktyabr — Oʻqituvchi va murabbiylar kuni munosabati bilan ichki ishlar organlarida “Yilning eng yaxshi murabbiyi” tanlovi oʻtkazildi.
Unda vazirlikning tarkibiy va hududiy boʻlinmalarida oʻtkazilgan saralash bosqichlarida gʻolib boʻlgan ustoz va murabbiylar oʻzaro bellashdilar.
Tanlov uchta shart asosida tashkil etildi.
Dastlab ishtirokchilarning intellektual salohiyati (IQ) test orqali baholandi. Shundan soʻng ular krossfit mashqlari va harbiy estafeta elementlarini birlashtirgan “Kuch birlikda” sinovida jismoniy tayyorgarligi, chaqqonligi hamda jamoada hamjihat harakat qilish mahoratini namoyon etdilar.
Yakuniy suhbatda esa murabbiylarning yil davomida amalga oshirgan ishlari, yosh xodimlar bilan ishlash tajribasi va erishgan natijalari baholandi.
Bu yilgi tanlovning oʻziga xos jihati — ustozlar bilan bir safda ularning shogirdlari ham ishtirok etganidir. Bu esa ustoz-shogird anʼanalarining amaliy ifodasini, oʻzaro ishonch va hamjihatlikning ahamiyatini namoyon etdi.
Ayol murabbiylarning faol ishtiroki va munosib natijalari ham bellashuvlarga yanada koʻtarinki ruh bagʻishladi.
Qizgʻin va murosasiz kechgan bellashuvlar yakuniga koʻra:
Birinchi oʻrin — IIV Akademiyasi Xizmat psixologiyasi va kasbiy madaniyati kafedrasi boshligʻi, podpolkovnik Farfiyev Yokubjon Atxamjanovichga;
Ikkinchi oʻrin — Jizzax viloyati Jizzax shahar IIB huzuridagi Tergov boʻlimi Jinoyatlarni tergov qilish boʻlinmasi boshligʻi, podpolkovnik Karimova Shaxnoza Baxtiyorovnaga;
Uchinchi oʻrin — Xorazm viloyati Urganch shahar IIB 1-son IIB HPG profilaktika katta inspektori, podpolkovnik Artikov Sardorbek Saparbayevichga nasib etdi.
Tanlov gʻolibi va sovrindorlari tegishli darajadagi diplomlar hamda pul mukofotlari bilan taqdirlandilar.
Mazkur tanlov ustoz va murabbiylarning ilgʻor tajribalarini ommalashtirish, ularning masʼuliyatli mehnatini eʼtirof etish hamda ichki ishlar organlarida ustoz-shogird anʼanalarini yanada mustahkamlashga xizmat qildi.