1-oktyabr — Oʻqituvchi va murabbiylar kuni munosabati bilan Jizzax viloyatida pedagog ayollar oʻrtasida “Ichki ishlar boshligʻi kubogi” musobaqasi tashkil etildi
2026-10-01 09:00:00 / Yangiliklar
Musobaqaning asosiy maqsadi pedagog ayollar oʻrtasida sogʻlom turmush tarzini targʻib qilish, ularning sportga boʻlgan qiziqishini oshirish, jismoniy tayyorgarligini mustahkamlash, shuningdek, jamoaviy hamjihatlik va oʻzaro doʻstona munosabatlarni yanada rivojlantirishdan iborat boʻldi.
Bellashuvlarda viloyatning turli hududlaridan tashrif buyurgan pedagog ayollar jamoalari ishtirok etdi.
Qatnashchilar voleybol bahslarida oʻzlarining jismoniy tayyorgarligi, sport mahorati, chaqqonligi, tezkorligi va jamoaviy harakat qilish qobiliyatini namoyon etdilar.
Qizgʻin va murosasiz kechgan voleybol bellashuvlarida har bir jamoa gʻalaba uchun bor kuch va imkoniyatlarini ishga soldi. Maydondagi keskin bahslar, aniq zarbalar va birdamlikka asoslangan oʻyinlar musobaqaga alohida shiddat bagʻishladi.
Musobaqa yakuniga koʻra, Gʻallaorol tumanidagi 26-son umumtaʼlim maktabi jamoasi birinchi oʻrinni egalladi.
Sharof Rashidov tumanidagi 35-son umumtaʼlim maktabi jamoasi ikkinchi, Baxmal tumanidagi 26-son umumtaʼlim maktabi jamoasi esa uchinchi oʻrinni qoʻlga kiritdi.
Musobaqa soʻngida gʻolib va sovrindor jamoalarni taqdirlash marosimi boʻlib oʻtdi.
Unda Jizzax viloyati IIB boshligʻi ishtirok etib, musobaqada yuqori natija qayd etgan jamoalarga diplom va qimmatbaho sovgʻalarni tantanali ravishda topshirdi.
Taqdirlash jarayonida ishtirokchilarga kasbiy faoliyatida muvaffaqiyatlar tilab, yosh avlod taʼlim-tarbiyasi yoʻlidagi sharafli mehnatlariga yuksak ehtirom bildirildi.
Shuningdek, bunday sport musobaqalari pedagoglar oʻrtasida sogʻlom raqobatni kuchaytirish, faol hayot tarzini qoʻllab-quvvatlash hamda jamoalar oʻrtasida doʻstona va iliq munosabatlarni mustahkamlashga xizmat qilishi taʼkidlandi.
Shu tariqa, “Ichki ishlar boshligʻi kubogi” voleybol musobaqasi koʻtarinki ruhda, qizgʻin va doʻstona tarzda oʻtkazilib, ishtirokchilarga unutilmas taassurotlar ulashdi.
Jizzax viloyati IIB Axborot xizmati