Navoiy viloyatida yoʻl-transport hodisalarining oldini olish boʻyicha amalga oshirilayotgan ishlar oʻrganildi
2026-09-30 11:35:00 / Yangiliklar
IIV JXD Yoʻl harakati xavfsizligi xizmati hamda Navoiy viloyati IIB rahbariyati tomonidan viloyatda yoʻl-transport hodisalarining oldini olish, yoʻl infratuzilmasini yaxshilash va harakat xavfsizligini taʼminlash borasida amalga oshirilayotgan ishlar oʻrganildi.
Yigʻilishda viloyatda yoʻl harakati xavfsizligini taʼminlashda yoʻl qoʻyilayotgan kamchiliklar tanqidiy muhokama qilinib, ularni bartaraf etish hamda YTHlarning oldini olish boʻyicha kelgusida amalga oshirilishi lozim boʻlgan chora-tadbirlar belgilab olindi.
Shuningdek, mavjud kuch va vositalardan samarali foydalanish, yoʻl infratuzilmasini yaxshilash, ekologik stikerlar, yoʻlovchi tashish faoliyati, moped va skuterlar harakati, diagnostika markazlari faoliyati bilan bogʻliq masalalar koʻrib chiqildi.
Navbahor tumani hududidan oʻtuvchi D-191 avtomobil yoʻlining 12–13-kilometrlari oraligʻida oʻrnatilgan qoidabuzarliklarni aniqlovchi yangi qurilma faoliyati ham oʻrganildi.
Mazkur qurilma quvib oʻtish, qarama-qarshi harakatlanish va tezlik bilan bogʻliq qoidabuzarliklarni aniqlash orqali ushbu turdagi YTHlarning oldini olishga xizmat qilishi taʼkidlandi.
Karmana tumanidagi M-37 avtomobil yoʻli “Guli“ savdo majmuasi yaqinida haydovchilarning hushyorligini oshirish maqsadida oʻrnatilgan monitor orqali profilaktik roliklarni namoyish etish ishlari ham koʻzdan kechirildi.
Shuningdek, Navoiy shahrining “Navoiy“ koʻchasida yoʻllarni taʼmirlash, asfalt yotqizish va obodonlashtirish boʻyicha amalga oshirilayotgan ishlar bilan yaqindan tanishildi.
IIV JXD Yoʻl harakati xavfsizligi xizmati Axborot xizmati