O‘zbеkiston Rеspublikаsi Ichki ishlаr vаzirligi

Ichki ishlar vazirligi huzuridagi Qoʻriqlash departamenti boshligʻi Qobil Shodibekov poytaxtimizning Mirobod tumanida jamoat xavfsizligini taʼminlash, kriminogen vaziyatni barqarorlashtirish hamda zamonaviy raqamli yechimlar asosida xavfsiz muhitni shakllantirish boʻyicha amalga oshirilayotgan ishlarni oʻrgandi.

Oʻrganishlar davomida asosiy eʼtibor hududlardagi mavjud xavf omillarini manzilli aniqlash, ularni barvaqt bartaraf etish, profilaktika ishlarining taʼsirchanligini oshirish va zamonaviy texnologiyalarni jamoat xavfsizligi tizimiga keng joriy etish masalalariga qaratildi.

Xususan, Yangi Zamon mahallasida videokuzatuv tizimlarining imkoniyatlaridan samarali foydalanish, hududdagi kuzatuv kameralarini yagona nazorat tizimiga integratsiya qilish orqali vaziyatni real vaqt rejimida kuzatish va tezkor chora koʻrish mexanizmlarini takomillashtirish zarurligi qayd etildi. Shu bilan birga, mahalladagi mehmon uylari va mehmonxonalarda xavfsizlik talablarini kuchaytirish, ularni mahalla yettiligi bilan hamkorlikda oʻrganish va qoʻriqlov imkoniyatlaridan keng foydalanish boʻyicha vazifalar belgilandi.

Taʼlim muassasalarida xavfsizlikni taʼminlash masalalari ham alohida eʼtibor markazida boʻldi. 56 va 175-sonli umumtaʼlim maktablari hamda ularga tutash hududlarda oʻquvchilarning xavfsiz harakatlanishi, kirish-chiqish nazorati va atrof hududlarda profilaktik choralarni yanada kuchaytirish masalalari koʻrib chiqildi. Shuningdek, yoshlarni zamonaviy texnologiyalarga qiziqtirish va ularning boʻsh vaqtini mazmunli tashkil etish maqsadida robototexnika yoʻnalishini rivojlantirish boʻyicha takliflar bildirildi.

Savr koʻchasidagi oʻrganishlar chogʻida aholi gavjum hududlarda tungi yoritish tizimlarini yaxshilash, fuqarolar uchun tezkor yordam chaqirish imkoniyatlarini kengaytirish maqsadida SOS-tashvish tugmalarini oʻrnatish va xavfsizlik infratuzilmasini yanada takomillashtirish boʻyicha aniq choralar belgilab olindi.

Shuningdek, tumandagi kriminogen vaziyatni doimiy tahlil qilib borish, xavf-xatarlarni oldindan baholash va kuch-vositalarni eng zarur nuqtalarga manzilli yoʻnaltirish imkonini beruvchi raqamli dasturni sinov tariqasida joriy etish vazifasi qoʻyildi. 1102 tizimi orqali kelib tushayotgan murojaatlarni manzillar kesimida tahlil qilish, takroriy murojaatlar kuzatilayotgan hududlarda mahalla yettiligi bilan hamkorlikda profilaktik ishlarni kuchaytirish masalasiga ham alohida urgʻu berildi.

Oʻrganishlar yakunida jinoyat sodir etilgandan keyin unga munosabat bildirish emas, balki xavfni oldindan koʻra bilish va uning oldini olishga qaratilgan zamonaviy boshqaruv tizimini shakllantirish ustuvor vazifa ekani taʼkidlandi.

Mirobod tumani misolida belgilangan ushbu choralar raqamli texnologiyalar, profilaktika va tezkor xizmat imkoniyatlarini yagona tizimga birlashtirib, aholi uchun yanada xavfsiz va barqaror muhit yaratishga qaratilgan.

IIV huzuridagi Qoʻriqlash departamenti Axborot xizmati