Kriminogen vaziyatni barqarorlashtirish, jinoyatchilikning barvaqt oldini olish va kiberxavflarga qarshi kurashish — ustuvor vazifalar
2026-09-26 08:00:00 / Yangiliklar
Ichki ishlar vazirligida joriy yilning 8 oyida respublikada kriminogen vaziyatning barqarorligi, jinoyatchilikka qarshi kurashish, huquqbuzarliklar profilaktikasi, kiberjinoyatlarning oldini olish hamda aholi oʻrtasida targʻibot ishlari holati muhokama qilindi.
Videoselektor yigʻilishida Ichki ishlar vaziri general-leytenant Aziz Tashpulatov, vazir oʻrinbosarlari, sohaviy xizmatlar va hududiy ichki ishlar organlari rahbarlari hamda shaxsiy tarkib ishtirok etdi.
Yigʻilishda hududlarda amalga oshirilgan ishlar tanqidiy-tahliliy nuqtayi nazardan koʻrib chiqilib, jinoyatchilikning oldini olish, uning sabab va shart-sharoitlarini bartaraf etish, kriminogen vaziyatni barqarorlashtirish va aholi xavfsizligini taʼminlash boʻyicha vazifalar belgilab berildi.
Bunda asosiy eʼtibor huquqbuzarlik sodir etilganidan keyin chora koʻrish emas, balki uni keltirib chiqaruvchi omillarni barvaqt aniqlash va bartaraf etishga qaratildi. Shu maqsadda hududlardagi vaziyatni chuqur tahlil qilish, masʼul xodimlar faoliyatini aniq natijaga yoʻnaltirish va sohaviy xizmatlar oʻrtasidagi hamkorlikni kuchaytirish boʻyicha topshiriqlar berildi.
Tadbirda kiberjinoyatchilikka qarshi kurashish va aholini axborot texnologiyalari sohasidagi tahdidlardan himoya qilish masalasiga ham alohida eʼtibor qaratildi.
Davlatimiz rahbari raisligida 24-sentyabr kuni Andijon viloyatini ijtimoiy-iqtisodiy rivojlantirish, tadbirkorlikni qoʻllab-quvvatlash va aholi daromadlarini oshirish masalalari boʻyicha oʻtkazilgan yigʻilishda jamoat xavfsizligini taʼminlash va kiberjinoyatlarning oldini olishda raqamli texnologiyalardan keng foydalanish yuzasidan berilgan topshiriqlarning ijrosini taʼminlash zarurligi taʼkidlandi.
Xususan, Andijon shahri, Shahrixon va Andijon tumanlari, Toshkent shahri va Chilonzor tumanlari ichki ishlar organlari rahbarlariga raqamlashtirish hamda kiberjinoyatlarga qarshi kurashish boʻyicha oʻrinbosar lavozimlari joriy etilishi, ular koʻchalardagi kameralar maʼlumotlarini sunʼiy intellekt orqali tahlil qilib, bezorilik, oʻgʻrilik va yoʻl-transport hodisalarining oldini olish boʻyicha yechimlar ishlab chiqishi taʼkidlandi.
Ushbu tajribani yil yakuniga qadar boshqa hududlarda ham joriy etish vazifasi qoʻyildi. Bu esa raqamli texnologiyalarni xavflarni aniqlash, tahlil qilish va profilaktik choralarni belgilashning samarali vositasiga aylantirishni nazarda tutadi.
Shuningdek, kiberjinoyatlarning barvaqt oldini olishda aholi bilan manzilli ishlash, ularning raqamli xavfsizlik boʻyicha bilimlarini oshirish va profilaktik targʻibotni kuchaytirish zarurligi qayd etildi.
Yigʻilish yakunida sohaviy xizmatlar va hududiy boʻlinmalar oʻrtasidagi hamkorlikni kuchaytirish, joylarga biriktirilgan masʼul xodimlar faoliyatini aniq natijaga yoʻnaltirish, belgilangan topshiriqlarning oʻz vaqtida va sifatli bajarilishini taʼminlash boʻyicha vazifalar belgilab berildi.