Jizzaxda “Eng yaxshi ekspert-kriminalist” va “Eng namunali ekspert-kriminalistika jamoasi” respublika koʻrik-tanlovining final bosqichiga start berildi
2026-09-24 18:55:00 / Yangiliklar
Bugun, Jizzax viloyatida “Eng yaxshi ekspert-kriminalist” va “Eng namunali ekspert-kriminalistika jamoasi” Respublika koʻrik-tanlovining ochilish marosimi boʻlib oʻtdi. Marosim Zomin tumanining eng nufuzli 60-sonli maktabida tashkillashtirildi.
Unda IIV Ekspert-kriminalistika bosh markazi boshligʻi polkovnik Saidolim Nuriddinov soʻzga chiqib, bu kabi tanlovlar nafaqat eng yuqori kasbiy tayyorgarlikka ega mutaxassislarni aniqlash, balki ekspert-kriminalistika xizmatining ilmiy va amaliy salohiyatini yanada oshirish, ilgʻor tajribalarni ommalashtirish hamda sohada sogʻlom raqobat muhitini mustahkamlashga xizmat qilishini taʼkidladi.
Ochilish marosimi bejiz viloyatning 60-sonli maktabida oʻtkazilmadi.
Sababi, tadbirdan soʻng maktab oʻquvchilariga, sohaning eng qiziq va oʻziga xos jihatlari boʻyicha dastlabki koʻnikmalar berildi yaʼni “masterclass” oʻtkazildi.
Shundan soʻng, “Eng yaxshi ekspert-kriminalist” va “Eng namunali ekspert-kriminalistika jamoasi” Respublika koʻrik-tanlovining dastlabki bosqichiga start berildi. Jamoalar oʻrtasidagi sogʻlom va joʻshqin raqobat koʻrik tanlovni yanada shiddatli oʻtishini taʼminlamoqda.
Taʼkidlash joizki, ushbu tanlov joriy yilning yoz oylarida viloyatlar kesimida oʻtkazildi va 1-2 oʻrinni egallagan ekspert-kriminalistlar Respublika bosqichida oʻz viloyatlari nufuzi uchun bellashmoqdalar.
IIV Ekspert-kriminalistika bosh markazi