Oʻzbekiston Respublikasi IIV delegatsiyasi Xitoyda raqamli kriminalistika texnologiyalari boʻyicha seminarda ishtirok etdi
2026-09-22 09:00:00 / Yangiliklar
2026-yil 7–20-sentyabr kunlari Oʻzbekiston Respublikasi Ichki ishlar vazirligi delegatsiyasi Xitoy Xalq Respublikasining Dalyan shahridagi Politsiya institutida tashkil etilgan “Raqamli kriminalistika texnologiyalari” mavzusidagi seminarda ishtirok etdi.
Seminar doirasida raqamli dalillarni toʻplash va saqlashning normativ-huquqiy asoslari, fayl tizimlari, shikastlangan, oʻchirilgan va shifrlangan maʼlumotlarni qayta tiklash, kompyuter xotirasi tasvirlarini tahlil qilish, shuningdek, Xitoyda ishlab chiqilgan maxsus apparat-dasturiy vositalar imkoniyatlari oʻrganildi.
Mobil kriminalistika yoʻnalishida smartfonlar, planshetlar va boshqa elektron qurilmalardan maʼlumotlarni ajratib olish, shifrlangan messenjerlar hamda bulutli saqlash xizmatlarini tahlil qilishning zamonaviy usullari koʻrib chiqildi.
Shu bilan birga, seminarda audioyozuvlarni shovqinlardan tozalash, ovoz boʻyicha shaxsni identifikatsiya qilish, yozuvlarning haqiqiyligini aniqlash, deepfake-audio va montaj izlarini fosh etish, shuningdek, foto va videotasvirlarni identifikatsiya va verifikatsiya qilish usullari oʻrganildi.
Mazkur seminar Oʻzbekiston Respublikasi IIV mutaxassislarining raqamli kriminalistika, sud-ekspertiza va jamoat xavfsizligi sohasidagi kasbiy bilim va amaliy koʻnikmalarini yanada oshirishga xizmat qildi.