O‘zbеkiston Rеspublikаsi Ichki ishlаr vаzirligi

Ichki ishlar vazirligi akademiyasi boshligʻi Rustam Xatamov mazkur yoʻnalishdagi ishlarni samarali tashkil etish maqsadida Mirzo Ulugʻbek tumanidagi aholi gavjum joylarda boʻldi.

Tungi oʻrganishlar davomida “Elobod”, “Podshobogʻ” va “Oqibat” mahallalarida jamoat tartibini saqlash, hududlarni qoʻriqlash, kriminogen vaziyatga salbiy taʼsir koʻrsatayotgan omillar, ayniqsa bezorilik jinoyatlarning barvaqt oldini olish borasida koʻrilayotgan chora-tadbirlar, amaliyotga tatbiq qilingan raqamli yondashuvlar tahlil qilindi.

Akademiya boshligʻi dam olish maskanlari, saylgohlar, ovqatlanish va savdo majmualarida boʻlib, tadbirkorlik subyektlari vakillari bilan muloqot qildi. Profilaktika inspektorlari, patrul-post va qoʻriqlash xizmati xodimlari faoliyatini oʻrganib, jamoat joylarida xavfsizlik choralarini kuchaytirish, “102” tizimiga tushgan murojaatlarga tezkorlik bilan munosabat bildirish, poytaxt ahli va mehmonlarining osoyishta hayotini taʼminlash yuzasidan topshiriq berdi.

Aytish joizki, “Buyuk ipak yoʻli” metro bekati yaqinida huquq-tartibot maskani tashkil etilgan boʻlib, maskanga hududdagi barcha videokameralar integratsiya qilingan. Kriminogen vaziyatning kun-u tun nazorat qilinayotgani shubhali holatlarni oʻz vaqtida aniqlash, huquqbuzarlikning barvaqt oldini olish va jinoyatlarni fosh etishda muhim omil boʻlmoqda.

Bundan tashqari, aholiga qoʻshimcha qulaylik yaratish maqsadida Qoʻriqlash departamenti ofisi faoliyati yoʻlga qoʻyilgan. Bu yerga kelgan fuqarolar xavfsizlik qurilmalarining texnik xususiyatlari, zamonaviy imkoniyatlari, ulardan foydalanish samaralari haqida zarur maʼlumotlar olishi mumkin. Akademiya boshligʻi mazkur tajribani keng targʻib qilish orqali fuqarolarning ogohligini oshirish, texnik qoʻriqlov xavfsizlikning ishonchli kafolati ekanligini har bir yurtdoshimizga tushuntirish zarurligini qayd etdi.

Oʻrganishlar yakuni boʻyicha Mirzo Ulugʻbek tumani Ichki ishlar organlari faoliyatini muvofiqlashtirish boshqarmasida kriminogen vaziyat bilan bogʻliq umumiy holat yuzasidan yigʻilish ham oʻtkazildi. Mutasaddi rahbarlar, masʼullar va akademiya vakillari ishtirokida oʻtgan yigʻilishda ichki ishlar vazirining joriy yil 8-sentyabrdagi farmoyishida belgilab berilgan dolzarb vazifalarning ijrosi muhokama qilindi.

Masʼullarga kriminogen vaziyatni barqarorlashtirish, jamoat xavfsizligini taʼminlash, jinoyatchilikka qarshi kurashish, aholi bilan manzilli ishlashni yanada takomillashtirish, jinoyatchilikning sabab va sharoitlarini kunlik tahlil qilib borish, muammolarning yechimlari boʻyicha tegishli chora-tadbirlarni ishlab chiqish, hududlarga mos tajribalarni yaratib amaliyotga joriy qilish borasida ustuvor vazifalar berildi.

IIV akademiyasi Axborot xizmati