Buxoro shahrida jinoyatchilik va huquqbuzarliklarning oldini olishga qaratilgan tanqidiy yigʻilish oʻtkazildi
2026-09-18 10:00:00 / Yangiliklar
Buxoro davlat universitetida viloyat Ichki ishlar boshqarmasi boshligʻi raisligida Buxoro shahridagi jinoyatchilik ahvoli, uning kelib chiqish sabablari va oldini olish choralariga bagʻishlangan kengaytirilgan yigʻilish boʻlib oʻtdi.
Tadbirda viloyat hokimi oʻrinbosari, viloyat IIB boshligʻining oʻrinbosarlari, shahar hokimi, prokuratura organlari masʼullari, shahardagi barcha 65 ta mahalla yettiligi hamda jinoyatchilikni oldini olishga masʼul barcha idora va tashkilot rahbarlari ishtirok etdi.
Yigʻilishda huquqbuzarliklarning oldini olish faqatgina huquqni muhofaza qiluvchi organlarning emas, balki barcha hamkor tashkilotlar, jumladan, taʼlim, sogʻliqni saqlash, Yoshlar ishlari agentligi, mahalliy hokimliklar va keng jamoatchilikning birgalikdagi muhim qonuniy vazifasi ekanligi alohida taʼkidlandi.
Tahlillarga koʻra, joriy yilning oʻtgan davrida viloyat miqyosida qayd etilgan jinoyatlarning asosiy qismini kibermakondagi huquqbuzarliklar tashkil etmoqda. Shuningdek, viloyat boʻyicha oldi olinishi lozim boʻlgan jinoyatlarning salmoqli qismi aynan Buxoro shahri hissasiga toʻgʻri kelayotgani qayd etildi.
Kun tartibidagi asosiy masala — Buxoro shahrida bezorilik jinoyatlarining ortish tendensiyasi keskin tanqid ostiga olindi. Oʻtgan yilga nisbatan bezorilik holatlari sezilarli darajada koʻpaygan boʻlib, viloyat boʻyicha sodir etilayotgan bunday jinoyatlarning qariyb yarmi aynan viloyat markazida yuz bermoqda.
Xususan, ushbu jinoyatlar eng koʻp qayd etilgan “S. Ayniy”, “Shayxon”, “Bexishtiyon”, “Joʻbor”, “J. Ikromiy”, “R. Hamroyev”, “Piridastgir” va “Shodlik” mahallalaridagi holatlar yuzasidan jinoyatda gumonlanuvchi va jabrlanuvchilar, ularning oila aʼzolari ishtirokida ochiq muhokama oʻtkazildi.
Bezorilik jinoyatlarida gumon qilinayotganlarning aksariyati yoshlar va talabalar ekanligi inobatga olinib, taʼlim muassasalari rahbarlariga tarbiyaviy nazoratni kuchaytirish vazifasi yuklatildi.
Qoidabuzar talabalar boʻyicha oliy taʼlim muassasalariga tegishli taqdimnomalar kiritilishi belgilandi va har qanday turdagi, xususan, bezorilik holatlari Buxoro shahriga mutlaqo yarashmasligi qatʼiy uqtirildi.
Tadbir yakunida masʼul rahbarlar bildirilgan fikr-mulohaza va tanqidlardan xulosa qilgan holda, Yoshlar ishlari agentligi hamda boshqa mutasaddi idoralar bilan hamkorlikda yoshlar jinoyatchiligining oldini olish boʻyicha aniq “yoʻl xaritasi” va kunlik ish rejalarini ishlab chiqish yuzasidan masʼullarga tegishli koʻrsatmalar berdi.
Shuningdek, bu kabi muhokamalar doimiy ravishda oʻtkazib borilishi belgilandi.
Buxoro viloyati IIB Axborot xizmati