O‘zbеkiston Rеspublikаsi Ichki ishlаr vаzirligi

Qoʻriqlash departamenti boshligʻi tomonidan poytaxtimizning Shayxontohur va Chilonzor tumanlarida aholi xavfsizligini taʼminlashning zamonaviy mexanizmlarini keng joriy etish, “raqamli xavfsiz muhit” tizimini takomillashtirish, taʼlim muassasalarida qoʻriqlash samaradorligini oshirish hamda fuqarolarga qoʻriqlash xizmatlarining imkoniyatlarini zamonaviy va innovatsion usullarda taqdim etishga qaratilgan oʻrganish ishlari olib borildi.

Oʻrganishlar doirasida, avvalo, Shayxontohur tumanidagi Suzuk ota mahallasi hududida xavfsiz muhitni yanada mustahkamlash masalalariga alohida eʼtibor qaratildi.

Xususan, tarixiy va maʼnaviy ahamiyatga ega Suzuk ota maqbarasi, masjidi va xiyoboni atrofida fuqarolar hamda ziyoratchilar uchun xavfsiz sharoit yaratish, hududni zamonaviy texnik qoʻriqlash vositalari bilan qamrab olish, videokuzatuv imkoniyatlaridan samarali foydalanish, ehtimoliy xavf-xatarlarni erta aniqlash va tezkor chora koʻrish mexanizmlarini kuchaytirish boʻyicha mavjud holat tanqidiy oʻrganildi.

Masʼullarga mazkur hududda xavfsizlik infratuzilmasini yagona tizim asosida takomillashtirish, zamonaviy raqamli texnologiyalar va texnik qoʻriqlash vositalarini bosqichma-bosqich joriy etish, aholi gavjum nuqtalarda profilaktik va tezkor choralar samaradorligini oshirish yuzasidan aniq vazifalar belgilab berildi.

Shuningdek, Samarqand darvoza hududi hamda Sebzor va Abdulla Qodiriy koʻchalari kesishmalarida aholi va tadbirkorlik subyektlariga qoʻriqlash xizmatlarini yanada yaqinlashtirish maqsadida yangi formatdagi “Security Office” xizmat koʻrsatish ofislarini tashkil etish masalalari koʻrib chiqildi.

Mazkur ofislar anʼanaviy xizmat koʻrsatish nuqtasidan farqli ravishda, qoʻriqlash xizmatlarining barcha turlari haqida zamonaviy formatda maʼlumot berish, texnik qoʻriqlash vositalari imkoniyatlarini namoyish etish, fuqarolar va tadbirkorlarga obyekt yoki xonadon xususiyatidan kelib chiqqan holda maqbul xavfsizlik yechimlarini taklif qilishga ixtisoslashtirilishi koʻzda tutilmoqda.

Bu orqali qoʻriqlash xizmatini aholiga yaqinlashtirish, murojaatdan xizmatni rasmiylashtirishgacha boʻlgan jarayonlarni soddalashtirish va sohada zamonaviy servis madaniyatini shakllantirish maqsad qilingan.

Oʻrganish ishlari Chilonzor tumanida ham davom ettirildi. Xususan, tumandagi 202-sonli umumtaʼlim maktabida yangi tartib asosida tashkil etilgan qorovullik xizmati, taʼlim muassasasi hududiga kirish-chiqishni boshqarish va nazorat qilish tizimlari, shuningdek, xavfsizlikni taʼminlashga jalb etilgan texnik vositalarning ishlash jarayoni koʻzdan kechirildi.

Taʼlim muassasalari xavfsizligi faqat qorovullik postini tashkil etish bilan cheklanmasligi, balki maktab hududi, kirish yoʻlaklari, oʻquv jarayoni va favqulodda holatlarga tezkor munosabat bildirish mexanizmlarini qamrab olgan yaxlit xavfsizlik tizimi asosida yoʻlga qoʻyilishi lozimligi taʼkidlandi.

Shu nuqtayi nazardan, kirish-chiqishni boshqarish, videokuzatuv, tezkor xabar berish vositalari hamda qoʻriqlash naryadlarining oʻzaro integratsiyalashgan holda ishlashiga alohida eʼtibor qaratildi. Shuningdek, maktabda Ichki ishlar vazirligi tashabbusi bilan tashkil etilgan, oʻquvchilarni uchuvchisiz uchish apparatlarini boshqarish va zamonaviy texnologiyalardan foydalanishga oʻrgatishga ixtisoslashtirilgan sinf faoliyati bilan ham tanishildi.

Mazkur tashabbus yosh avlodda zamonaviy texnologiyalarga qiziqishni oshirish, ularni raqamli bilim va amaliy koʻnikmalarga yoʻnaltirish bilan bir qatorda, kelgusida xavfsizlik sohasida intellektual va texnologik yechimlardan foydalana oladigan malakali kadrlarni shakllantirish nuqtayi nazaridan muhim ahamiyat kasb etishi qayd etildi.

Oʻrganishlar yakunida har bir hudud va obyekt boʻyicha mavjud imkoniyatlarni chuqur tahlil qilgan holda, xavfsizlikni taʼminlashga zamonaviy, manzilli va texnologik yondashuvlarni keng joriy etish, qoʻriqlash xizmatlarini aholi uchun yanada qulay va ochiq formatda tashkil etish hamda yangi loyihalarni amaliyotga tezkor tatbiq qilish boʻyicha mutasaddilarga tegishli topshiriqlar berildi.

Bugungi kunda xavfsizlikni taʼminlash faqat sodir boʻlishi mumkin boʻlgan huquqbuzarlikka javob qaytarish bilan emas, balki zamonaviy texnologiyalar, raqamli nazorat, tezkor boshqaruv va profilaktik yondashuvlar orqali xavf-xatarlarni oldindan aniqlash va bartaraf etish bilan belgilanmoqda.

Poytaxt hududlarida amalga oshirilayotgan mazkur ishlar ham aholi osoyishtaligini taʼminlash, taʼlim muassasalarida ishonchli xavfsiz muhitni shakllantirish hamda qoʻriqlash sohasini zamonaviy texnologiyalar va sifatli servis asosida yangi bosqichga olib chiqishga xizmat qiladi.