Namangan viloyatining Toʻraqoʻrgʻon va Norin tumanlarida jinoyatchilikni jilovlash va xavfsiz muhitni taʼminlash borasidagi ishlar tahlil qilindi
2026-09-18 09:00:00 / Yangiliklar
Viloyat hududida mahallalarda jinoyatchilik va huquqbuzarliklarning barvaqt oldini olish, aholi osoyishtaligini taʼminlash hamda xavfsiz muhitni shakllantirish maqsadida ichki ishlar organlari va boshqa mutasaddi tashkilotlar bilan hamkorlikda tizimli chora-tadbirlar amalga oshirilmoqda.
Bugun Namangan viloyati IIB boshligʻi rahbarligida Toʻraqoʻrgʻon va Norin tumanlarida mahallalarda amalga oshirilayotgan ishlar tanqidiy-tahliliy ruhda muhokama qilindi. Kengaytirilgan yigʻilishlarda tuman rahbarlari, tuman IIB shaxsiy tarkibi, mahalla masʼullari hamda sohaga daxldor tashkilot va idoralar vakillari ishtirok etdi.
Yigʻilishlarda hududlardagi kriminogen vaziyat, jinoyat va huquqbuzarliklarning sabab va omillari, ularni barvaqt aniqlash va bartaraf etish borasida amalga oshirilayotgan ishlar tahlil qilinib, mavjud muammolarni manzilli hal etish boʻyicha tegishli choralar belgilab olindi.
Muhokama davomida tuman IIB rahbarlariga jinoyatchilikning oldini olishda manzilli ishlashni kuchaytirish, sodir etilgan jinoyatlarning sabab va sharoitlarini chuqur tahlil qilish, profilaktika ishlarini aniq natijaga yoʻnaltirish, oilaviy-maishiy nizolar va yoshlar oʻrtasida huquqbuzarliklarning oldini olish, shuningdek, aholi murojaatlarini oʻz vaqtida koʻrib chiqib, muammolarni joyida hal etish yuzasidan aniq vazifalar topshirildi.
Shu bilan birga, tuman IIB xodimlarining xizmat faoliyati, tergovga qadar tekshiruv jarayoni va yurituvdagi jinoyat ishlarining holati tanqidiy-tahliliy oʻrganilib, aniqlangan kamchiliklarni bartaraf etish, ishlarni qonunchilik talablari asosida sifatli va oʻz vaqtida yuritish boʻyicha tegishli koʻrsatmalar berildi.
Namangan viloyati IIB Axborot xizmati