Fransiya Respublikasi Ichki ishlar vazirligining Oʻzbekistondagi vakili Siril Gu Toshkentda faoliyatini boshladi
2026-09-18 09:00:00 / Yangiliklar
Joriy yilning 17-sentyabr kuni Fransiya Respublikasi Ichki ishlar vazirligining Oʻzbekistondagi vakili Siril Guning Toshkentdagi faoliyatini boshlashi munosabati bilan Oʻzbekiston Respublikasi Ichki ishlar vazirligi Xalqaro hamkorlik boshqarmasi rahbariyati bilan uchrashuv boʻlib oʻtdi.
Uchrashuvda Siril Gu Fransiya Respublikasi Ichki ishlar vazirligi tomonidan Markaziy Osiyo davlatlarining huquq-tartibot organlari bilan hamkorlikni muvofiqlashtirish uchun masʼul etib belgilanganini maʼlum qildi.
Shuningdek, uning faoliyatini Toshkent shahrida olib borishi Oʻzbekiston va Fransiya oʻrtasidagi huquq-tartibot sohasidagi hamkorlikni yanada rivojlantirish uchun muhim ahamiyat kasb etishini taʼkidladi.
Muloqot davomida Fransiya va Oʻzbekiston ichki ishlar vazirliklari oʻrtasidagi hamkorlikni yangi bosqichga olib chiqish, xususan, xodimlarning malakasini oshirish, oʻzaro tajriba almashish hamda yuqori darajadagi oʻzaro tashriflarni tashkil etish masalalari muhokama qilindi.
Tomonlar hamkorlikni yanada jadallashtirish va mavjud aloqalarni mustahkamlash boʻyicha birgalikda ish olib borishga kelishib oldilar.
Uchrashuv yakunida Oʻzbekiston Respublikasi Ichki ishlar vazirligi Xalqaro hamkorlik boshqarmasi rahbariyati Siril Guga masʼuliyatli faoliyatida muvaffaqiyat tiladi.