O‘zbеkiston Rеspublikаsi Ichki ishlаr vаzirligi

Men Oʻzbekistonni, avvalo, shu yurtda tugʻilib-oʻsganim, uning tinch osmoni, bagʻrikeng xalqi va ertangi kunga ishonch bilan qadam tashlayotgani uchun sevaman. Ichki ishlar organlari xodimi sifatida esa Vatanga boʻlgan muhabbatim yana bir yuksak masʼuliyat bilan boyigan.

Mustaqillikning dastlabki yillarida ichki ishlar organlarining asosiy vazifasi mamlakat tinchligi, jamoat xavfsizligi va fuqarolar osoyishtaligini taʼminlashdan iborat edi. Vaqt oʻtishi bilan tizim nafaqat jinoyatchilikka qarshi kurashuvchi, balki inson huquq va manfaatlarini himoya qiluvchi xizmatga aylanib bordi. Bugungi kunda har bir xodimning faoliyatida “Xalq manfaatlariga xizmat qilish” tamoyili ustuvor ahamiyat kasb etmoqda. Bu oʻzgarishlar ichki ishlar organlari faoliyatining huquqiy asoslarini mustahkamlash bilan bir qatorda, jamoatchilik bilan hamkorlikni ham yangi bosqichga olib chiqdi.

Soʻnggi yillarda amalga oshirilgan islohotlar tizim faoliyatini yanada zamonaviylashtirishga xizmat qilmoqda. Axborot texnologiyalari xizmat jarayoniga keng tatbiq etilmoqda. Biometrik identifikatsiya, raqamli kriminalistika, videokuzatuv tizimlari, elektron maʼlumotlar bazalari va intellektual tahlil vositalari xodimlarning ish samaradorligini sezilarli oshirdi. Ilgari koʻp vaqt talab qilgan jarayonlar bugun qisqa fursatda, aniq va shaffof tarzda amalga oshirilmoqda. Bu esa ham xodimlar mehnatini yengillashtirdi, ham fuqarolar uchun qulayliklar yaratdi.

Ichki ishlar organlari tizimida “Inson qadrini ulugʻlash” tamoyili tobora mustahkamlanmoqda. Mahallalarda profilaktika ishlarining kuchaytirilishi, xotin-qizlar, yoshlar va nuroniylar bilan manzilli ishlash, huquqbuzarliklarning oldini olishga qaratilgan yangi yondashuvlar tinchlik va barqarorlikni taʼminlashda muhim oʻrin tutmoqda. Bugun har bir mahalla xavfsizligi uchun masʼul tizim shakllanib, aholi bilan muloqot va hamkorlik kuchaydi.

Men ichki ishlar organlarida xizmat qilishni oddiy kasb emas, balki Vatan oldidagi muqaddas burch deb bilaman. Har kuni xizmat libosini kiyganimda, ortimda butun xalqimning ishonchi turganini his qilaman. Shu ishonch insonni yanada masʼuliyatli, vijdonli va fidoyi boʻlishga undaydi. Zero, Vatan tinchligini asrash — katta sharaf.

Oʻzbekistonni sevish — uning mustaqilligini mustahkamlash, qonunlariga hurmat bilan qarash va xalq tinchligiga munosib hissa qoʻshish demakdir. Shuning uchun ham “Men nechun sevaman Oʻzbekistonni?” degan savolga javobim bitta: chunki bu yurt menga erkinlik, sharafli burch va xalqimga sidqidildan xizmat qilish baxtini bergan muqaddas Vatandir!

© “Postda” gazetasi, Sherzodbek Nuriddinov, Andijon viloyati IIB Axborot xizmati boshligʻi, mayor.