O‘zbеkiston Rеspublikаsi Ichki ishlаr vаzirligi

Yelkasida kursantlik pogoni, qoʻlida qasamyod matni va qalbida cheksiz gʻurur bilan saf tortgan minglab yigit-qizlar bugun sharafli burch, vatan himoyasiga kirishish arafasida turibdilar.

Akademiyaning oʻquv dala poligonida jismoniy-jangovar hamda harbiy tayyorgarlikdan oʻtib, mashgʻulotlarda toblangan, Vatan himoyachisi degan tuygʻuni yurakdan his etgan kursantlarning har biri Ona Vatanimiz istiqlolining ramzi boʻlgan muqaddas Mustaqillik monumenti ostida birma-bir qasamyod qabul qildilar.

Bir xil libosda, monand harakatlarni amalga oshirayotgan hamda mushtarak maqsad birlashtirgan bu yoshlarning dillarini hayajon titrogʻiga solib jaranglagan har bir jumla, kursantlarning Vatanga boʻlgan sadoqatini, uning tinchligini koʻz qorachigʻidek asrashga yoʻlidagi qatʼiyatini namoyon etdi.

Yangi Oʻzbekiston ichki ishlar organlari xodimlari safiga qoʻshilgan kursantlarni tantanali safga qabul qilish marosimi Akademiyada koʻtarinki ruhda tashkil etildi.

Tantanali tadbir Ichki ishlar vaziri general-leytenant Aziz Tashpulatov tomonidan ochib berildi. Davlatimiz rahbari taʼkidlaganidek “Uchinchi renessans” bunyodkorlari boʻlgan bu yigit-qizlarga bildirilayotgan ishonch bir necha yillar oʻtib albatta oʻz natijasini beradi. Ularga tinimsiz bilim olish, oʻz ustida ishlash uchun yaratilgan sharoitlardan unumli foydalanib, huquqni muhofaza qilish va jamoat xavfsizligini taʼminlash sohasini mukammal oʻrganish asosiy vazifa ekanligi taʼkidlandi.

Qayd etish joizki, Akademiyaning kunduzgi taʼlim bakalavriatida qabul kvotasi 2024/2025 oʻquv yilidan boshlab 700 tadan 900 taga oshirildi, joriy yildan esa 1 100 taga yetkazildi. Kadrlar tayyorlash sifatini yanada oshirish va raqamli taʼlim muhitini yaratish maqsadida Akademiya infratuzilmasi tubdan modernizatsiya qilinib, eng soʻnggi texnologiyalar bilan jihozlangan yangi innovatsion bino va inshootlar barpo etilmoqda.

Yoshlarga oid davlat siyosatini izchil amalga oshirish maqsadida Iqtidorli kursantlar kengashi tashkil etilib, bilimli, tashabbuskor va fidoyi kursantlar uchun “Jaloliddin Manguberdi” nomidagi stipendiya, “Akademiya aʼlochisi”, “Iqtidorli kursant” koʻkrak nishonlari hamda “Choʻlpon” koʻkrak nishoni va stipendiyasi taʼsis etildi.

Davlatimiz rahbarining joriy yil 26-avgustdagi “Ichki ishlar organlari uchun professional kadrlarni tayyorlash tizimini transformatsiya qilish choratadbirlari toʻgʻrisida”gi 303-son qarori bilan endilikda Akademiyada taʼlim jarayoni kredit-modul tizimi asosida tashkil etiladi. Kursantlar birinchi kursdan boshlab IIV sohaviy xizmatlari va hududiy boʻlinmalariga biriktirilib, bitiruvchi kurs kursantlariga oʻqishni yakunlagunga qadar “katta serjant” maxsus unvoni beriladi.

Koʻrsatkichlarini real vaqt rejimida jamlab borish maqsadida yaxlit raqamli portfolio yaratilib, kadrlarning xizmat faoliyatidagi oʻsish salohiyatini prognoz qilish va ularga “istiqbolli karyera” modeli boʻyicha tavsiyalar berish amaliyoti joriy etiladi.

Muxtasar aytganda, yangi qaror asosida ichki ishlar organlari uchun professional kadrlarni tayyorlashning yagona, uzluksiz va zamonaviy tizimi yoʻlga qoʻyilib, taʼlim sifati va samaradorligi mutlaqo yangi bosqichga olib chiqiladi.

Shundan soʻng, Ichki ishlar vaziri tomonidan kursantlarni qasamyodlarida keltirilgan vaʼdalari qabul qilinib, Akademiya imzosiga aylagan anʼanaviy saf yurishi boshlandi.

Har bir kursant qasamyodini diliga joylab, vazirlik rahbariyati, nufuzli mehmonlar, shaxsiy tarkib va ota-onalarining nigohi oldida Vataniga, xalqiga va Prezidentiga sadoqat bilan xizmat qilishga ahd qildilar.

Mana shu oʻzgarmas va yillar davomida xodimlarning jon tomiriga singib ketgan soʻzlar, bugundan ushbu yosh kadrlar ichki ishlar organlari tizimining kelajagi ekanligidan dalolat beradi.

Shuningdek tadbirda bir guruh yuqori bosqich kursantlariga stipendiya guvohnomalari ham topshirildi. Xususan, 2-bosqich kursantlari Ruxshona Murodilayeva, Akobir Fayzulloyev hamda 3-bosqich kursantlari Sevinch Ochilova va Elbek Azimovlar “Ichki ishlar vaziri stipendiati” faxriy yorligʻi bilan taqdirlandi.

“Ichki ishlar vazirligining Jaloliddin Manguberdi nomidagi stipendiati” faxriy yorligʻi esa 2-bosqich kursanti Abubakir Isoxonov va 3-bosqich kursanti Diyorbek Kamoldinovlarga topshirilgan boʻlsa, 3-bosqich kursanti Sarvinoz Umarova “Oliy Bosh qoʻmondon” davlat stipendiyasi sohibi” sifatida eʼtirof etildi.

Tadbirda soʻz olganlar bugungi kunning boʻlajak ofitserlar faoliyatidagi ahamiyati, Akademiyada Yangi Oʻzbekiston ichki ishlar organlari xodimlarini tayyorlash uchun soʻngi yillarda yoʻlga qoʻyilgan oʻziga xos tizim, ota-onalarning farzandlaridan kutayotgan yuksak natijalari haqida toʻxtalib, yoshlarga yana bir bor ishonch bildirishdi.

Kursantlar oldida uch yillik mashaqqatli shu bilan birga har qanday insonni yuksaltiruvchi oʻquv yillari turibdi. Quvonch koʻz yoshlari bilan farzandini quchayotgan ota-onalar, akasiga havas bilan boqib turgan jajji bolajonlar bugun ularning muvaffaqiyatidan vatan osoyishtaligini taʼminlashdek sharafli burchga bel bogʻlaganidan faxrlanmoqda.