Sirdaryoda profilaktika inspektorlari faoliyati tahlil qilinib, ustuvor vazifalar belgilandi
2026-09-11 15:00:00 / Yangiliklar
Sirdaryo viloyati Ichki ishlar boshqarmasida viloyat ichki ishlar boshqarmasi boshligʻi, polkovnik Sardor Mirzaraimov rahbarligida joriy yilning oʻtgan sakkiz oyi davomida huquqbuzarliklar profilaktikasi yoʻnalishida amalga oshirilgan ishlar, mavjud muammo va kamchiliklar hamda kelgusidagi ustuvor vazifalarga bagʻishlangan tanqidiy-tahliliy muhokama yigʻilishi oʻtkazildi.
Yigʻilish avvalida boshqarma boshligʻi tomonidan davlatimiz rahbarining ichki ishlar organlarining jamoat xavfsizligini taʼminlash faoliyatiga yangicha ishlash tizimini joriy etish chora-tadbirlari toʻgʻrisidagi tegishli qarori mazmun-mohiyati xodimlarga yetkazilib, unda belgilangan ustuvor vazifalarni joylarda oʻz vaqtida va sifatli amalga oshirish yuzasidan masʼullarga aniq topshiriqlar berildi.
Shundan soʻng hududiy profilaktika inspektorlarining sakkiz oy davomida jinoyat va huquqbuzarliklarning barvaqt oldini olish, alohida toifadagi shaxslar, nizoli oilalar, voyaga yetmaganlar, ishsiz va ijtimoiy muammoli fuqarolar bilan manzilli ishlash, shuningdek, murojaatlar bilan ishlash samaradorligi tanqidiy-tahliliy ruhda muhokama etildi.
Yigʻilish davomida ayrim hududlarda yoʻl qoʻyilgan kamchiliklarning sabablari tanqidiy koʻrib chiqilib, ularni bartaraf etish, profilaktik ishlarni manzilli va natijador tashkil etish boʻyicha tegishli koʻrsatma va topshiriqlar berildi.
Boshqarma boshligʻi har bir profilaktika inspektori oʻziga biriktirilgan hududdagi kriminogen vaziyatni chuqur tahlil qilishi, jinoyat va huquqbuzarliklarni sodir etishga moyil shaxslar hamda muammoli oilalar bilan individual ishlashni kuchaytirishi, jinoyat sodir etilishiga olib keluvchi omillarni barvaqt aniqlab, ularni bartaraf etish choralarini koʻrishi lozimligini taʼkidladi.
Yigʻilish yakunida xizmat faoliyatida xato va kamchiliklarga yoʻl qoʻygan ayrim xodimlar qatʼiy ogohlantirilib, kelgusida bunday holatlarga yoʻl qoʻymaslik yuzasidan aniq vazifalar belgilandi.
Shu bilan birga, oʻz xizmat vazifalarini vijdonan bajarib, hududida jinoyat va huquqbuzarliklarning oldini olish, aholi bilan manzilli ishlash hamda jamoat xavfsizligini taʼminlash borasida yuqori natijalarga erishgan bir guruh profilaktika inspektorlari boshqarma boshligʻining pul mukofotlari bilan ragʻbatlantirildi.
Sirdaryo viloyati IIB Axborot xizmati