IIV rahbariyati tomonidan Namangan viloyatida xavfsizlik va osoyishtalikni taʼminlash borasidagi ishlar tanqidiy-tahliliy oʻrganildi
2026-09-11 10:55:00 / Yangiliklar
Ichki ishlar vaziri oʻrinbosari, general-mayor Baxodir Mirzaraximov Namangan viloyatida boʻlib, hududda jamoat xavfsizligini taʼminlash, xususan, transport obyektlarida xavfsizlik choralarini kuchaytirish, jinoyatchilikka qarshi kurashish samaradorligini oshirish hamda ichki ishlar organlarida xizmat intizomi holatini tanqidiy-tahliliy oʻrgandi.
Oʻrganishlar davomida transport obyektlarida fuqarolarning xavfsizligini taʼminlash, huquqbuzarliklarning oldini olish va ularga oʻz vaqtida barham berish boʻyicha amalga oshirilayotgan ishlarga alohida eʼtibor qaratildi.
Jumladan, temir yoʻl vokzallari, bekatlar va boshqa transport infratuzilmasi obyektlarida jamoat tartibini saqlash, profilaktik tadbirlarni tizimli tashkil etish, videokuzatuv vositalaridan samarali foydalanish hamda sodir etilishi mumkin boʻlgan huquqbuzarliklarni barvaqt aniqlash borasidagi ishlar tahlil qilindi.
General-mayor Baxodir Mirzaraximov transport obyektlarida xavfsizlikni taʼminlash masalasiga yuzaki yondashmaslik, mavjud muammolarni chuqur tahlil qilgan holda ularning aniq yechimlarini belgilash, profilaktik choralarni kuchaytirish boʻyicha masʼul rahbarlarga tegishli koʻrsatma va topshiriqlar berdi.
Shuningdek, viloyatda jinoyatchilikka qarshi kurashish va huquqbuzarliklarning oldini olish borasida amalga oshirilayotgan ishlar natijadorligi tanqidiy-tahliliy muhokama qilindi. Ayniqsa, jinoyatlarning sabab va shart-sharoitlarini aniqlash, profilaktik hisobda turgan shaxslar bilan manzilli ishlash, mahallalarda xavfsiz muhitni shakllantirish hamda sodir etilgan jinoyatlarni tezkor va sifatli fosh etish masalalariga urgʻu berildi.
Tahlillar jarayonida ayrim yoʻnalishlarda ishlarni tashkil etishda kamchiliklarga yoʻl qoʻyilayotgani koʻrsatib oʻtildi. Aniqlangan muammolarni bartaraf etish, natijadorlikni oshirish va har bir rahbarning shaxsiy masʼuliyatini kuchaytirish boʻyicha aniq vazifalar belgilab berildi.
Tashrif davomida ichki ishlar organlarida xizmat intizomi va qonuniylikni taʼminlash masalasi ham alohida koʻrib chiqildi. Xodimlarning xizmat vazifalariga masʼuliyat bilan yondashishi, fuqarolar bilan muloqotda xushmuomalalik va kasbiy odob qoidalariga rioya etishi, korrupsiya va xizmat vakolatlarini suiisteʼmol qilish holatlariga mutlaqo murosasiz munosabatda boʻlish zarurligi taʼkidlandi.
General-mayor Baxodir Mirzaraximov ichki ishlar organlari xodimlarining xizmat intizomi jamoat xavfsizligini taʼminlashda muhim omil ekanini taʼkidlab, rahbarlardan qoʻl ostidagi xodimlar faoliyatini doimiy nazorat qilish, aniqlangan kamchiliklarni oʻz vaqtida bartaraf etish va xizmat intizomini mustahkamlash choralarini koʻrishni talab qildi.
Tashrif yakunida transport obyektlarida xavfsizlikni taʼminlash, jinoyatchilikka qarshi kurashish samaradorligini yanada oshirish, huquqbuzarliklarning oldini olish va xizmat intizomini mustahkamlashga qaratilgan aniq vazifalar belgilab berildi.
Belgilangan chora-tadbirlarning ijrosini taʼminlash, aholi osoyishtaligini asrash va hududda xavfsizlik muhitini yanada mustahkamlash ichki ishlar organlarining ustuvor vazifasi sifatida qayd etildi.