O‘zbеkiston Rеspublikаsi Ichki ishlаr vаzirligi

Bugun Toshkent shahar Qoʻriqlash xizmati binosida Qoʻriqlash departamenti boshligʻi, polkovnik Qobil Shodibekov hamda Oʻzbekiston Respublikasi Turizm qoʻmitasi raisi oʻrinbosari Suhrobjon Bobokalonov ishtirokida uchrashuv boʻlib oʻtdi.

Muloqotda mamlakatimizga tashrif buyurayotgan xorijiy va mahalliy sayyohlarning shaxsiy xavfsizligini ishonchli taʼminlash, ular uchun xavfsiz, qulay va barqaror turistik muhit yaratish borasidagi hamkorlikning ustuvor yoʻnalishlari muhokama qilindi.

Taʼkidlanganidek, bugungi kunda turizm sohasining jadal rivojlanishi, mamlakatimizga kelayotgan xorijiy mehmonlar soni va turistik yoʻnalishlar koʻlamining kengayib borishi xavfsizlikni taʼminlash boʻyicha zamonaviy va manzilli yondashuvlarni tatbiq etishni taqozo etmoqda.

Shu nuqtayi nazardan, Qoʻriqlash departamenti va Turizm qoʻmitasi rahbariyati oʻrtasida sayyohlarning shaxsiy xavfsizligini taʼminlashga qaratilgan manzilli dasturlar, aniq chora-tadbirlar hamda ularni amalga oshirishning samarali mexanizmlari atroflicha koʻrib chiqildi.

Xususan, turistik oqim yuqori boʻlgan hududlar, tarixiy va madaniy meros obyektlari, mehmonxonalar, dam olish maskanlari hamda sayyohlik yoʻnalishlarida zamonaviy qoʻriqlash xizmatlarini bosqichma-bosqich joriy etish masalalariga alohida eʼtibor qaratildi.

Uchrashuv davomida Qoʻriqlash departamenti tomonidan amaliyotga joriy etilgan yangi xizmat turlari va ularning imkoniyatlari taqdim etildi. Jumladan, jismoniy shaxslarni qoʻriqlashga moʻljallangan tansoqchilik xizmatidan xorijiy sayyohlar, rasmiy delegatsiyalar, biznes vakillari va mamlakatimizga turli maqsadlarda tashrif buyuruvchi mehmonlarning shaxsiy xavfsizligini taʼminlashda samarali foydalanish masalasi muhokama qilindi.

Mazkur xizmat safar davomida shaxs xavfsizligini taʼminlash, ehtimoliy xavf-xatarlarni oldindan baholash, harakatlanish yoʻnalishlarida zarur xavfsizlik choralarini tashkil etish hamda favqulodda vaziyatlarda tezkor chora koʻrish imkonini berishi bilan ahamiyatli ekani qayd etildi.

Shu bilan birga, turistik obyektlarda qoʻriqlashning texnik vositalari, zamonaviy videokuzatuv tizimlari, tezkor harakatlanuvchi guruhlar va boshqa texnologik yechimlarni keng qoʻllash orqali xavfsizlikning kompleks tizimini shakllantirish boʻyicha takliflar bildirildi.

Uchrashuvda turizm sohasida xavfsizlikni taʼminlash faqat alohida obyekt yoki shaxsni qoʻriqlash bilan cheklanmasligi, balki sayyoh mamlakatimizga kirib kelgan paytdan boshlab uning butun sayohati davomida xavfsiz va ishonchli muhitni his etishiga xizmat qilishi lozimligi alohida taʼkidlandi.

Bunda turistik yoʻnalishlar kesimida xavf-xatarlarni tahlil qilish, turistik obyektlar va infratuzilmalarni oʻrganish, zarur joylarda qoʻriqlash xizmatlarini kuchaytirish, tezkor aloqa va munosabat bildirish mexanizmlarini yoʻlga qoʻyish masalalari muhim ahamiyat kasb etadi.

Qayd etilganidek, zamonaviy turizmda xavfsizlik mamlakatning xalqaro nufuzi va turistik jozibadorligini belgilovchi asosiy mezonlardan biri hisoblanadi. Sayyoh uchun yaratilgan xavfsiz va xotirjam muhit uning mamlakat haqidagi ijobiy taassurotini mustahkamlaydi, Oʻzbekistonga qayta tashrif buyurish istagini oshiradi hamda yurtimizni ishonchli turistik manzil sifatida targʻib etishga xizmat qiladi.

Shu maʼnoda, sayyohlar xavfsizligini taʼminlashga qaratilgan zamonaviy mexanizmlarni joriy etish nafaqat huquq-tartibot va xavfsizlik sohasidagi vazifa, balki mamlakatimiz turistik salohiyatini yanada oshirish, xalqaro turizm bozorida raqobatbardoshligini mustahkamlash va Oʻzbekistonning ijobiy imijini yuksaltirishga qaratilgan muhim omil sifatida baholandi.

Muloqot yakunida Qoʻriqlash departamenti va Turizm qoʻmitasi oʻrtasidagi amaliy hamkorlikni yanada kengaytirish, turistik yoʻnalishlar kesimida manzilli dasturlarni ishlab chiqish, zamonaviy qoʻriqlash xizmatlarini joriy etish hamda sayyohlar uchun xavfsizlikning ishonchli va samarali tizimini shakllantirish boʻyicha hamkorlikdagi ishlarni izchil davom ettirishga kelishib olindi.

Zero, sayyohning xavfsizligi — uning mamlakatga boʻlgan ishonchi, bu ishonch esa Oʻzbekistonning xalqaro turistik jozibadorligi va nufuzini yanada mustahkamlashga xizmat qiladi.

IIV huzuridagi Qoʻriqlash departamenti Axborot xizmati