Sirdaryo viloyati IIB rahbariyati tomonidan jinoyatchilik profilaktikasi, huquqbuzarliklarga qarshi kurashish va murojaatlar bilan ishlash masalalari boʻyicha tanqidiy-tahliliy yigʻilish oʻtkazildi
2026-09-08 10:00:00 / Yangiliklar
Sirdaryo viloyati Ichki ishlar boshqarmasi boshligʻi, polkovnik Sardor Mirzaraimov rahbarligida viloyatda jinoyatchilikning oldini olish, huquqbuzarliklarga qarshi kurashish hamda fuqarolar murojaatlari bilan ishlash borasida amalga oshirilayotgan ishlar yuzasidan tanqidiy-tahliliy yigʻilish oʻtkazildi.
Videokonferensaloqa shaklida tashkil etilgan yigʻilishda viloyatdagi barcha shahar va tuman ichki ishlar organlari rahbarlari, masʼul xodimlar ishtirok etdi.
Yigʻilish davomida joriy yilning 8 oyi mobaynida hududlarda jinoyatchilik va huquqbuzarliklarning oldini olish borasida amalga oshirilgan ishlar, erishilgan natijalar bilan bir qatorda, xizmat faoliyatida yoʻl qoʻyilgan xato va kamchiliklar ham batafsil muhokama qilindi.
Ayniqsa, jinoyat sodir etilishining oldini olish, muammoli oilalar va profilaktik hisobda turuvchi shaxslar bilan manzilli ishlash, sodir etilgan jinoyatlarning sabab va omillarini bartaraf etish, shuningdek, fuqarolarning murojaatlarini oʻz vaqtida va qonuniy koʻrib chiqish masalalariga alohida eʼtibor qaratildi.
Xizmat faoliyatida sustkashlikka yoʻl qoʻygan, topshiriqlar ijrosini taʼminlashda kamchiliklarga ega boʻlgan masʼullarga tegishli koʻrsatma va topshiriqlar berilib, ish samaradorligini oshirish, aniqlangan muammolarni tezkor bartaraf etish hamda kelgusida bunday holatlarning takrorlanishiga yoʻl qoʻymaslik yuzasidan qatʼiy choralar belgilandi.
Yigʻilish yakunida hududlarda kriminogen vaziyatni barqaror saqlash, jinoyatchilikning barvaqt oldini olish, fuqarolar murojaatlari bilan ishlash sifatini yanada oshirish hamda aholining ichki ishlar organlariga boʻlgan ishonchini mustahkamlash borasida masʼullarga aniq vazifalar yuklatildi.
Sirdaryo viloyati IIB Axborot xizmati