Huquqbuzarliklar profilaktikasi va jamoat xavfsizligi: Qashqadaryo viloyati IIBda ustuvor vazifalar belgilab olindi
2026-09-08 09:00:00 / Yangiliklar
Yigʻilishga ichki ishlar vazirining birinchi oʻrinbosari – Jamoat xavfsizligi departamenti boshligʻi, polkovnik Timur Ismailov raislik qildi. Qashqadaryo viloyati ichki ishlar organlari, huquqbuzarliklar profilaktikasi, jamoat tartibini saqlash, yoʻl harakati xavfsizligi, probatsiya xizmatlari hamda sohaviy xizmatlar rahbarlari ishtirok etdi.
Hisobot yigʻilishlari tanqidiy-talabchan va prinsipial ruhda oʻtkazilib, har bir yoʻnalish kesimida erishilgan natijalar hamda yoʻl qoʻyilgan kamchiliklar chuqur tahlil qilindi.
Xususan, kriminogen vaziyat, huquqbuzarliklar profilaktikasi samaradorligi, jamoat tartibini taʼminlash, yoʻl harakati xavfsizligi, probatsiya xizmati faoliyati, xizmat intizomi va qonuniylikka rioya etish holati atroflicha muhokama qilindi.
Oʻtkazilgan tahlillar natijasiga koʻra, Qashqadaryo viloyatida jinoyatlarning oldini olish va huquq-tartibotni mustahkamlashga qaratilgan kompleks chora-tadbirlar amalga oshirilayotgani qayd etildi.
Shu bilan birga, ayrim yoʻnalishlarda mavjud kamchiliklar keskin tanqid qilinib, ularni bartaraf etish yuzasidan aniq vazifalar belgilab berildi.
Jumladan, viloyatda huquqbuzarliklar profilaktikasi va jamoat xavfsizligini taʼminlash sohasida manzilli profilaktika sifatini oshirish, profilaktik hisobda turgan shaxslar bilan ishlash samaradorligini kuchaytirish, davlat hokimiyati organlari va jamoatchilik bilan hamkorlikni yanada mustahkamlash masalalariga alohida eʼtibor qaratildi.
Yigʻilishlar yakuniga koʻra, huquqbuzarliklar profilaktikasi samaradorligini oshirish, jamoat tartibini mustahkamlash, yoʻl-transport hodisalarini kamaytirish, profilaktik va probatsiya hisobida turgan shaxslar bilan ishlashni takomillashtirish boʻyicha tegishli topshiriqlar berildi.
Belgilangan vazifalar ijrosi Ichki ishlar vazirligi rahbariyati tomonidan alohida nazoratga olindi.
IIV JXD Axborot xizmati