Buxoro viloyatida “Eng yaxshi ekspert-kriminalist” koʻrik-tanlovining hududiy bosqichi boʻlib oʻtdi
2026-09-07 10:20:00 / Yangiliklar
Oʻzbekiston Respublikasi Prezidentining 2022-yil 8-fevraldagi 122-sonli qarori hamda Ichki ishlar vazirligining 2022-yil 27-apreldagi 127-sonli buyrugʻiga asosan, ichki ishlar organlari tizimida har yili “Eng namunali ekspert-kriminalistika jamoasi” va “Eng yaxshi ekspert-kriminalist” koʻrik-tanlovlarini oʻtkazish anʼanaga aylangan.
Shu munosabat bilan, Buxoro viloyati Ichki ishlar boshqarmasi Ekspert-kriminalistika xizmati va uning quyi tizimlari xodimlari oʻrtasida “Eng yaxshi ekspert-kriminalist” koʻrik-tanlovining viloyat bosqichi tashkil etildi. Tanlov ishtirokchilari jami uch bosqichda oʻzaro bellashdilar.
Dastlab xodimlarning nazariy bilim darajasini aniqlash maqsadida test sinovlari oʻtkazilgan boʻlsa, navbatdagi bosqichda ularning Kalashnikov avtomati va Makarov pistoletini toʻliqsiz qismlarga ajratish hamda yigʻish boʻyicha amaliy mahoratlari tekshirildi. Yakuniy suhbat jarayonida esa ishchi guruh aʼzolari tomonidan mutaxassislarning huquq va majburiyatlari, sohaviy meʼyoriy hujjatlarni bilishi, tergov-tezkor guruhi tarkibidagi faoliyati hamda kriminalistika yoʻnalishidagi maxsus bilim va koʻnikmalari har tomonlama baholandi.
Tanlov yakunlariga koʻra, barcha shartlar boʻyicha eng yuqori natijani qayd etgan ishtirokchi gʻoliblikni qoʻlga kiritib, tanlovning respublika bosqichida Buxoro viloyati sharafini himoya qilish yoʻllanmasiga ega boʻldi.
Oʻtkazilayotgan bu kabi tadbirlar tizimda sogʻlom raqobat muhitini shakllantirish, xodimlarning intellektual salohiyatini oshirish hamda oʻz kasbining fidoyilarini munosib ragʻbatlantirishga xizmat qiladi.
Buxoro viloyati IIB Axborot xizmati