O‘zbеkiston Rеspublikаsi Ichki ishlаr vаzirligi

Xorazm viloyatida jamoat xavfsizligini mustahkamlash, kriminogen vaziyatni barqarorlashtirish hamda ichki ishlar organlari faoliyati samaradorligini yanada oshirishga qaratilgan masalalar yuzasidan xalq deputatlari viloyat Kengashining navbatdan tashqari sessiyasi oʻtkazildi.

Tadbirda Ichki ishlar vaziri general-leytenant Aziz Tashpulatov, viloyat hokimi Joʻrabek Raximov, xalq deputatlari Kengashi aʼzolari, masʼul idoralar va hamkor tashkilotlarning rahbarlari, shahar va tumanlar jamoatchilik faollari, shuningdek, huquqni muhofaza qiluvchi organlar rahbar va xodimlari qatnashdi.

Sessiyada dastlab kun tartibida belgilangan tashkiliy masala muhokama etildi.

Ichki ishlar vazirligining tegishli buyrugʻi asosida, Ichki ishlar vazirligi Akademiyasi magistratura bosqichi bitiruvchisi podpolkovnik Kaimxodjayev Oybek Abdukarimovich Xorazm viloyati Ichki ishlar boshqarmasi boshligʻi etib tayinlangani maʼlum qilindi.

Shuningdek, sessiya davomida viloyatdagi kriminogen vaziyat, jinoyatchilikning oldini olish va unga qarshi kurashish borasida amalga oshirilayotgan ishlar tahlil qilinib, mavjud muammolarni bartaraf etishga qaratilgan choralar koʻrib chiqildi.

Alohida eʼtibor, Oʻzbekiston Respublikasi Prezidentining mahallalarda xavfsiz muhitni taʼminlash va profilaktika ishlarini kuchaytirishga qaratilgan qaror hamda topshiriqlarida belgilangan vazifalarning ijrosiga qaratildi.

Shu nuqtayi nazardan, yangi rahbar zimmasiga nafaqat jinoyatchilikka qarshi kurashish koʻlami va samaradorligini oshirish, balki hududlarda tinchlik va osoyishtalikni taʼminlashning yangi, taʼsirchan mexanizmlarini hayotga tatbiq etishdek muhim va masʼuliyatli vazifalar yuklandi.

Tadbirda, xavfsiz muhitni taʼminlash, avvalo, har bir mahallada jinoyat va huquqbuzarliklarning barvaqt oldini olish, aholi bilan ochiq va samimiy muloqotni yoʻlga qoʻyish, odamlarni qiynayotgan muammolarni joyida aniqlab, ularni bartaraf etishdan boshlanishi taʼkidlab oʻtildi.

Bundan tashqari, shahar va tuman ichki ishlar boʻlimlari rahbarlariga, profilaktik ishlarni formal tadbirlar doirasidan chiqarib, har bir xonadon, har bir oila va har bir fuqaroning hayotidagi muammolarga manzilli yondashuv asosida tashkil etish, murojaatlar ortida turgan asl sabab va omillarni chuqur tahlil qilish ustuvor vazifalardan biri sifatida belgilandi. Jinoyat sodir etilishiga sabab boʻlayotgan omillarni har bir mahalla kesimida aniqlab, manzilli bartaraf etish boʻyicha tegishli topshiriqlar berildi.

Sessiya yakunida bildirilgan taklif va mulohazalar umumlashtirilib, viloyatda tinchlik va osoyishtalikni yanada mustahkamlash, jamoat tartibini taʼminlash hamda aholi xavfsizligini oshirishga qaratilgan navbatdagi vazifalar belgilab olindi.